Эрзянь Мастор/2004/10/Концерт-мазычи, концерт-урок

From Wikisource
Jump to navigation Jump to search
Эрзянь Мастор, № 10 (185), 27 мая 2004 edited by Нуянь Видяз, Кшуманцянь Пиргуж
Концерт-мазычи, концерт-урок by Нуянь Видяз
Статья на сайте газеты: № 185, 27.05.2004, Концерт-мазычи, концерт-урок
 
Концерт-мазычи, концерт-урок

Икелень чись одтнэнь кедьсэ

 

Saranso ламо кить ульнесть “инетнеде”, кодат ансяк концертт арасельть. Ансяк истямо, кодамо невтсть панжиковонь 13 чистэ Республикань Культурань дворецсэ Буянкин Юрий ды Алышева Елена Саранонь эрицятне эзть нейне. Сон кецневтинзе ды аламнеде мик талакавтынзе кунсолыцятнень мик ушодомасонзо. Ветицятне — од цёра ды тейтерь — кевкстнить Юрань ды Ленань. Каршо вал сынь кирдить покш, сценанть сэрьшка–келейшка... экрансто. Мадсь «кинось». Лиси прясто пильгс оршазь ашосо Лена. Моры классикасто: Гуно, Моцарт, Чайковский, Ардити... Вайгелезэ чевте, мазый, чудикерькскекс шольниця сопроно.

Пауза. Гувк кирвазсь экранось. Ёвтневи Юрань эрямо таркадонзо, Березникень буень Дягиль веледе. Терди-капшавты васов-васов покш келей ки. Вана тетянзо-аванзо кудосткак...

Неть читнестэ Сарансольть Суоминь Сибелиус лемсэ музыкань академиясто ломанть. Прявтост академиянь ректорось Pekko Pavavori. Сакшнось Юрань концертс «Менайсет» авань ансамблясь. Морась кавто морот: суоминь кезэрень пингень моро ды эрзянь — «Кодамо моро минь моратано...». Кунсолыцятне вастызь ды ильтизь суоминь инжетнень виев, чадыведекс шалныця цяпамосо.

Седеяк кецневтинзе залсо аштицятнень концертэнть омбоце пельксэзэ — эрзянь. Сон панжовсь Маризь Кемалень стихензэ лангс сёрмадозь моросонть «Монь вечкемась тонеть...». Теке жо шкастонть, морамсто, невтевсь балетэнь дуэт неоклассицизмань стильсэ. Мельганзо гайгезевсь «Пандо прясо» морось, алтазь сон «Торама» ансамблянтень. Морась Лена, гитарасо тензэ седясь полазо Юра. Сценань удало стенасонть-экрансонть невтевить ламоксть покшолгавтозь сулейть-лайшицят.

Паро, лембе валт-арсемат ёвтасть од ломантненень, Юранень ды Ленанень, малавиксэнзэ Дягиль велестэ. Вишка тейтерне ды цёрыне казсть артисттнэнень балягань пусмот. Паро валт ёвтасть велень прявтось Сергей Косынкин ды школань тонавтыцясь. Сынст ванькс эрзянь кортамост паро мельсэ кунсолость рузонь ломантнеяк. Маризь: те келесь аволь пельс рузыязь кель, кода ламот арсить. «Зябамо», «бороновамо», «мамай», «папкай» валт эзть маряво.

Кивчк валдомгадсь шаршавось-экранось. Эйсэнзэ Алёшкин Андреень картинанзо «Лики моих предков». Лейне, чувтт, вирьчире, сакалов ды сынтемест чамат. Философиянь питне максы (кадрань удало вайгельсэ) Алёшкин Андрей, Мордовиянь национальной Комитетэнь важодицясь. Кодат домка мельть, кодамо лиякс, образ вельде ёвтазь кортамо, ды кодамо чевте, ванькс ды гайгиця эрзянь кель те сценасонть.

Меельце номерэсь: Юра ды Дулкин Геннадий седить нудейсэ, Лена моры: «Те кудонь Юртава...» Вайгелесь терди теевемс содавиксэкс умонь шкатнень марто, ваномс мелест, вечкемс ютазенть. Мадсь меельце нотась. Цяпамотнеде цяк а сезеви залось.

Лиссь сцена лангс Тултаев Петр, Мордовиянь культурань министрась. Арсесь паро мельть концертэнь путыцятненень, Буянкин Юранень ды Алышева Ленанень. Кортась мокшокс, кува-кува совавтнесь эрзянь валт. Истят тевть — министрась кортаволь чачома кельсэнзэ — Мордовиясо арасельть. Седе товгак кирдть истя, Петр Николаевич!

«Трилогия любви» концертэсь — те келей эскелькс эрзянь ды мокшонь культурасонть, туема концертэнь путнемань ташто, куштазь койтнеде. Теезь-ладсезь фолк-арт-рок стильсэ. Эйсэнзэ сюлмавить академиянь лувсо морамось ды электричествань неень инструментнэсэ седямось. Седе кемекстазь те стилесь Великобританиясо. Сон невтизе кодамо вий, кодамо оймень эждиця мазычи минек кезэрень культурасонть, седеяк, зярдо малавгавтовить раськень ды профессиянь искусстватнень сюлмавомсто. Од ломантне, Юра ды Лена, режиссёрось Кузьмин Игорь, кона ульнесь режиссёрокс «Зов Торама» фильмантень, сценаристэсь ды художникесь Дулкин Геннадий панжизь сельмест рузонь ваныцятнень: эрзятненень ды мокшотненень, максовиндеряй тенст оля, тееви истямо искусства, истямо сэрьксчи, конань а свал нейсак РТР-сэ, ОРТ-сэ, ТНТ-сэ ды седе тов. Ламот рузтнэде чарькодизь ды зярдояк а ёвтасызь обывателень, превтемень, мезеньгак асодыцянь валтнэнь: «Мы вам культуру дали, помогли с дерева спуститься... Без нас вы бы..».

Эрьва шкась онкстни мазычинть покшолманзо эсензэ сэльсэ. 19 пингстэ истя онкстневсть, 20-цестэ — лиякс. Ней 21 пинге. «Трилогиясь» невтизе эрзянь искусствань эрямонь кинть ды кодамо онкстнемасо онкстнемс сонзэ.

Нуянь Видяз

Буянкин Юра ды Алышева Лена! Сюкпря парсте арсезь, анокстазь ды невтезь «Трилогия любви» концертэнк кис. Тынь муинк эрзянь морамонь искусствасонть сехте валдо ёнкссонть ды тердтядо лиятненьгак эскелямс сонзэ пелев. Арсетяно тенк седе товгак апак пупорькшне, каштанчинь кирдезь молемс муезь кияванк сырнекс цитниця тештенть пелев.

Паронь арсезь Эрзянь келень идема Фондонь ломантне, «Эрзянь Мастор» газетась


RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal.