Эрзянь Мастор/2004/06/Тундонь шкава-малава

←Ступени. К 70-летию Нуянь Видяза (Евгения Четвергова)

Эрзянь Мастор, № 6 (181), 24 марта 2004 edited by Нуянь Видяз, Кшуманцянь Пиргуж Тундонь шкава-малава. "Иень тюст" книгастонть саевкст. by Нуянь Видяз

Чадыковонь 16-це чистэ - эрзянь келень чи→

Статья на сайте газеты: № 181, 24.03.2004, Тундонь шкава-малава. "Иень тюст" книгастонть саевкст.

 

Тундонь шкава-малава.
"Иень тюст" книгастонть саевкст.

Иетне

Меельце иетнестэ кулят тундодонть учнян пиже озязтнэнь пельде. Эйкакшшкастом сондензэ яволявтнильть казямо вайгель варситне. Сындест мейле жойнезевиль пиренек удалга свал ков-бути эряскалиця чольдерькай лейнесь. Те шкантень полавтовильть педе пес паксятнень тюсост, каладыльть китне, седе валдомильть пакшатнень чамаст. Окойники каятыльть веленек томбальде витнемадо мейле сыця трактортнэнь урномаст. Сынст зэртесь ульнесь чапинекс: лембесь а потавтови.

Те ульнесь умок.

Кода ней?

Ней тундось сакшны тунь лиякс. Маряви тень, мартонзо лиссь кодамо-бути апаро. Сакшны сон кекшнезь, эсь перьканзо ваннозь ды прянь апак шна. А чадыведень шалт, а письма-ронь морот. Арась, а кирвазстевить тензэ икеле ладсо кеняр-ксонь сяткот.

Мекс?

Мекс сон теевсь прянь нолдазь аштиця урекс? Кие чумось?

Сонсь тундось эли, паряк, мон?

Килеень морсемат

Автобусонь вальматнень тона ёнга келей-кувака коцтокс уить ловсо вельтязь паксятне. Сынь чинть каршо кувтолдыть си-якс.

Сэняжа сувонть пачк чиить икельгам олгонь капат, чувтт, куракшт... Паро ялгакс ахолдась тень сёлмосонзо ды сеске ёмась сыречиденть раужола вармаведьгевесь.

Шказо тундонь, ансяк тей зярс эзь пачкодть.

Чаротне эрязасто ловить эйгажа вайгельбетнень. Сядо вейке, сядо кавто... Апак учо васов тердиця кись чопавтсь пиче вирьс ды керизе сонзэ кавтов. Сэрей пильге чувтнэ сельмень сявадозь вансть лангозонок.

Вана ношкстасть сельмем икельде пичетне ды састь тарказост килейть. Лангсост ашо ды раужо суресэ кемельдязь покайть. Прок одирьват налксема-киштема кужосо! Прясост цивтордыть сиясо викшнезь пангот.

Каштордыть чаротне. Кивчкаить тюстнэ.

Ванан вальмава ды пелян: илязан лыказеве, пелян, тан-давтсынь мазычитнень. Веенст килейтне каштансто, прянь верьга кандозь, тукшныть удалов, лиятне, седе веёнсетне, лисить сынст таркас. Неть таркань полавтнематне-чарамотне вельть молить эрзянь кезэрень пингень киштематнень-морамотнень ёнов.

Морыть килейть!

Маряви тень, кода гайги вирень эль марявиця музыкась. Паряк, аволь килейтькак истя вастыть тундонть? Паряк, кувака руцясо тейтерть лиссть кужонть куншкас?

— Марят, морыть? — каятотсь кутьмерем удалдо авань соланя вайгель. — Кодамо лужаня моронть лувозо!

Вана кись сайсь лия ёнкс, ды валдо нусманячиде пешксе килеень кужось кадовсь удалов, ды одс панжовсть паксянь ды васоло неявиця вирьбулонь сэняжа ёнкстнэ, одс кивчкаезевсть сэдть, палманть, веле чиреть...

Од, кавшаня черь шоферэсь варштась минек енов ды эряскавтызе машинанзо.

«Иля панть эйсэнзэ, цёрам, иля чиевть! — эськан энялдынь наян цёрантень. — Ардт седе састо. Иля капша туемс мазычинть эйстэ. Аволь васов кадовсь. Паряк, одс велявтат? Мелеть арась кунсоломс морот тундонь вастомадо? Мурдак! Мезе тонеть те ашти? Эли сынь тонеть а эрявить?»

Арась, эзть пачкоде энялдома валом.

Чеерь ды «чеерне»

Сокс кикстнэнь трокс эчке каярксокс таргавсть чеерень челькеть. Сынь вирь курынестэнть кирдсть ки пакся пелев.

Ков сыргась пшти пейнесь? Пекинензэ пештеме эли, паряк, киненьгак инжекс?

Велявтынь соксом «ставксонь» кувалт. Эка! Вантая! Васо-девсь лия марто! Истя вана! Ды мезть абунгалемс? Ушосонть эйзюрков. Сонзэ луш валдо ды лембе налксеманзо пувтасызь кулозентькак.

Кепедия вановтом ды варштынь удалов. Вай, зяро ютась! Кол, неяви, паксява лытыцясь, аволь калява понксонь кандт-ницятнеде.

«Зяро монень сонзэ ладсо саволь онкстнемс? — апак учо сась превезэм. — Изняволь-аволь тень зняронь юткось?»

«Айгором» ускимизь аволь васоло олгонь капантень. Озынь чикуншка ёнов сувсо лексиця олготнень лангс. Таргия зепстэм блокноткем. Эзь кемеве эстеньгак. Чееренть кондякс монень саволь кандомс эсь сталмом... ветесядт вайгельбень ютко! Кандомс, содазь, видестэ-видестэ лов шушмо потмова, вирьга-латкова. Зяро чинь перть изнявольть тень неть вайгельбетне,— ловномост эзинь карма. Чарькодеви цифравтомояк.

Истя вана! А мезть тенек покшкавтнемс. Чееренть коряс минь — чеернеть.

Сэнь моро

Келейстэ увны-лайши вармась. Сон летьке ды лембе; марявить пеняцямонь увтсонзо тундонь вайгельть. Чинь-кавтонь ютазь сэнь суликакс теевсть тия-тува ведьсельминеть. Сынст лангс сельмень сявадозь вансь ды ваннось эсь чачонзо ракиця чипаесь.

Каршом эскели аволь сэрей, аволь вишкине ёлганя рунго тейтерь.

Оршазь сон прясто пильгс ванькс сэньсэ: сэньшть мериця лембе паця, синтетикасто шождыне сэнь пальто, сэнь цюлкат, сэнь молевкс...

«Ванодо, — ульнесь мелем меремс марямга, — менеленть сэнь тюсозо валгсь тенек!»

Эзинь кирдеве, варштынь Тундонь пазокс молиця тейтеренть чачос. У-уйк — ютась пачкам сонзэ сэнь вановттонзо. «Ёвтыка, нилькскем, тон аволь Менельават?» — цяк эзинь пшкаде вакскам сэнь ютыцянтень.

Менельстэ эли кадык косто лиясто кие-бути ялатеке пшкали тензэ: «Монь менельнем!».

Виде, те «кие-бути». Ансяк аволь мон.

Сестэ эно кода монень меремс?

Кадык эно кадови тень «сэнь морокс».