Эрд вылын гу нӧрыс эм
(Январ 9ʼ л. 1905ʼ воӧ усьысьясӧс казьтыштӧм)
Дасӧд верст вылын столича карсянь
Эрд шӧрын нӧрыстор эм...
Сэтысь кывлывлӧ кырнышлӧн карзӧм —
Лёк кырнышыд сы вылӧ-й эм...
Январ тӧлысьын, вой шӧра войын,
Эрд вылас локтісны йӧз:
Мед казакъяс морт виысь сарлӧн
Туйпомсӧ (лёк уджлысь) дзебисны сідз...
Кузь войбыд найӧ сэн кодйисны пыдӧ
Ӧтласа паськыд зэв гу.
Вочасӧн карсяньыс морт шойяс вайисны,
Кыв ни джын некод эз шу.
Кыдз сэсся гуас шойяссӧ лӧдісны,
Гирилюк тойлалігтыр,
Вылісянь кыдзикӧн кын муӧн тыртісны
(Гу пытшкас муыс эз тӧр!)
* * *
Дасӧд верст вылын столича карсянь
Эрд вылын гу нӧрыс эм...
Сэтысь кывлывлӧ кырнышлӧн горзӧм —
Сьӧд кырнышыд сы вылӧ-й эм...
Еджыд лым улын, пемыд гу пытшкын
Усьысьяс куйлӧны тыр...
Ӧкмысдас ӧкмыс рӧгӧза кулльын, —
Гу пытшкысь муыс оз тӧр.
Куйлӧны... Кодікӧ жугалӧм юрӧн,
Кодлӧнкӧ орӧма ки,
Кодлӧнкӧ морӧсас свинеча-ыргӧн, —
Кодлӧнкӧ бать, кодлӧнкӧ пи...
Волісны сы бӧрын гу дорас сэтчӧ
Бурторйӧн казьтывлысь йӧз,
Мудз чужӧма уджалысь йӧз котыр,
Кыдз колӧ казьтыштны мед!..
Дыр найӧ жугыля, кыв ни джын шутӧг
Гу дорын шогсисны сэн,
Вомкӧтшныс чорыда кодӧскӧ ёрис,
Кӧсйысис мынтыны водзӧс...
* * *
Дасӧд верст вылын столича карсянь
Эрд вылын гу нӧрыс эм...
Сэтысь кывлывлӧ кырнышлӧн карзӧм —
Сьӧд кырнышыд сы вылӧ-й эм...
Май лунӧ кырнышъяс тӧдлісны сэтӧн,
Кыдз волісны казьтывлысь йӧз.
На дінӧ волісны казакъяс плетьӧн,
Вӧтлісны гу дорсьыс сэсь.
Кыдз сэсся вокъяслы пышйыны лои
(Водзсасьны нинӧм эз вӧв),
Кыдз мырддисны гӧрд знамя киысь
Да лойисны няйтыскӧд сор...
Но тӧдласны кырнышъяс мӧдысь!..
Регыд нин, матын нин кад,
Кор сувтас став уджалысь йӧзыс
Да лэптысяс гӧрд рӧма плаг!..
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1941 году и был посмертно реабилитирован в 1956 году, соответственно эта работа выйдет в России в общественное достояние в 2027 году.
The author died in 1941, so this work is also in the public domain in countries and areas (outside Russia) where the copyright term is the author's life plus 80 years or less. |