Эньлы

by Лыткин Георгий Степанович

Эньлы  (1889)  by Лыткин Георгий Степанович

Гижан кад: 1889, Йӧзӧдан во: 1889. Ӧшмӧс: Зырянский край при епископах пермских и зырянский язык : пособие при изучении зырянами русского языка / сост. Г. С. Лыткин. - Санктпетербург, 1889.

Югыд шондіӧй, эньӧй!
Лун морӧса эньӧй!
Чӧскыд йӧла эньӧй!
Мича чунь пома эньӧй!
Лӧсьӧдысьӧй, чеччӧдысьӧй!
Кӧмӧдысьӧй, пасьтӧдысьӧй!
Вердысьӧй, удысьӧй!
Небыд вольпась вылын узьтӧдысьӧй!
Та вылӧ ӧмӧй тэ, майбырӧй,
Гу дор, горт дор бергалін (пукалін)?
Та вылӧ ӧмӧй тэ, майбырӧй,
Менӧ чужтін, петкӧдін?
Та вылӧ ӧмӧй тэ, майбырӧй,
Сюръя лайканнад лайкӧдін?
Та вылӧ ӧмӧй тэ менӧ, коньӧрӧс,
Ки пом акань пыдди тетькӧдлін?
Та вылӧ тэ менӧ, коньӧрӧс,
Пидзӧс пом акань пыдди чеччӧдлін?
Кытчӧ тай менӧ, коньӧрӧс,
Чужтін-петкӧдін;
Сэтчӧ тай менӧ, коньӧрӧс,
Гырддза выйӧныд сюйыштін;
Сэтчӧ тай менӧ, коньӧрӧс,
Пидзӧс выйӧныд муркнитін;
Сэтчӧ тай менам, коньӧрлӧн,
Мед лолӧй петӧ!
Кужин тай тэ менӧ, коньӧрӧс,
Лы кузяым нюжӧдныс;
Кужин тай тэ менӧ, коньӧрӧс,
Яй кызаым кызӧдныс;
Кужин тай тэӧй меным, коньӧрлы,
Мича паськӧм лӧсьӧдны.
Эн тай тэӧй кужлывлы
Лёк пырсьыд горӧдны;
Эн тай тэӧй кужлывлы
Чорыд пырсьыд шулыны.
Югыд шондіӧй
Менам тіян ордын мичасьӧмӧй!
Уна тай меӧй, коньӧрӧй,
Тэнсьыд бур синтӧ вежмӧді;
Уна тай меӧй, коньӧрӧй,
Эзысь кытшъя пельтӧ сьӧдмӧді;
Уна тай меӧй, коньӧрӧй,
Тэнсьыд бур юртӧ янӧді.
Кыдз нӧ меӧй, коньӧрӧй,
Тэкӧд олӧмсӧ кута вунӧдны?
Кыдз нӧ меӧй, коньӧрӧй,
Дась пызан сайӧ пуксьӧмсӧ кута вунӧдны?
Кыдз нӧ меӧй, коньӧрӧй,
Дась сёян дорысь чеччӧмсӧ кута вунӧдны?
Небыд вольпась вылын узьтӧдысьӧй!
Эн тай кужлыв менӧ чуксавныс:
Ӧтчыд тай вӧлі воан чуксавныс —
Кос выйӧдзым шебралан;
Мӧдысь тай вӧлі воан чуксавныс —
Пель выйӧдзым (выйӧным) шебралан;
Коймӧдысь тай вӧлі воан чуксавныс —
Уль вый небыд кывнад чукӧстан,
Нямыр небыд чунь помнад вӧрзьӧдан.
Юр вывтіӧн (выйӧн) шебрыштан.
Тэ тай вӧлі асывнас чеччывлан,
Быдтор идрасян, пӧжасян;
Мед нӧ меӧй, коньӧрӧй, ог садьмывлы,
Кок чунь вылад ветлӧдлан.
Эг тай меӧй чуксавтӧг чеччывлы;
Кор тай вӧлі меӧй чеччыла,
Тэнад асыв (асъя) уджыд нин эштӧдӧма,
Ме тай вӧлі дзоля пыдди ола.
Кыдз нӧ меӧй, коньӧрӧй,
Йӧз ай-эньыскӧд кута овнысӧ?
Уна тай меным ковмас юрын,
Юр садьыс уна ковмас;
Уна тай меным ковмас пелям,
Пель садьыс уна ковмас;
Уна тай меным ковмас айка-энькалы
Лӧсьӧдчӧмыс уна ковмас.
Йӧз айка-энька водзас муна —
Ог тай налы кужлыв (джодж кузя) муннысӧ:
Ньӧжйӧджык кӧ ме муна —
Найӧ тай меным шуасны:
«Ичмонь пӧ миян вайӧма,
Оз пӧ тай вермы коксӧ кыскыны»;
Ӧдйӧджык кӧ тай ме муна,
Найӧ лёкпырысь меным шуасны:
«Миян пӧ ичмонь вайӧма,
Джодж пӧ миянлысь лёкысла жугӧдлӧ».
Ёна тай тэнӧ меӧй дӧзмӧді —
Эн бара менӧ, коньӧрӧс, вунӧд;
Ёна тай тэнӧ меӧй шогдӧді —
Эн бара менӧ лӧга-нора пуктӧд.
Югыд шондіӧй! Мича чунь помаӧй!
Кок улӧдзым тэд меӧй юрбита
Вердӧмыд-удӧмыд вылӧ,
Кӧмӧдӧмыд-пасьтӧдӧмыд вылӧ,
Бура видзӧмыд, быдтӧмыд вылӧ,
Аньтуй вылӧ пуксьӧдӧмыд вылӧ.