Ыджыд чери да ичӧт чери
| Ыджыд чери да ичӧт чери (1914) by |
| Гижан кад: 1914, Йӧзӧдан во: 1914. Ӧшмӧс: Коми мойдан и сьылан кывъяс. Сыктывдінкар, 1914. Лб. 5-8. |
Югыд визув ваын
Еджыд Кельчи оліс,
Лыа дорті ветліс,
Шӧрӧ петны поліс.
«Ме пӧ, ичӧт чери,
Кыдзи сэтчӧ муна?
Ветлӧны пӧ сэні
Ыджыд чери уна».
Важысянь нин Кельчи
Ассьыс донсӧ тӧдіс.
Сэтшӧм сылы мывкыд
Чужигӧн ен сетіс.
Ӧтчыд сійӧс аддзис
Лыа дорысь Ёді,
Бӧжӧн лёг-лёгкерис,
Юаліс: «Тэ коді?»
Шуис сылы Кельчи:
«Ме пӧ олысь татчӧс.
Кытчӧ пӧ тэ ачыд
Мӧдӧдчин ва катчӧс?»
Юрсӧ лэптіс Ёді
«Ме пӧ вывлань кая.
Саридзысь бур юӧр
Черияслы вая.
Ичӧтъяслы петіс
Ыджыдлы моз вӧля
Кывзӧй, кодлы колӧ,
Кывзӧй, коді пеля!»
Чуймис ичӧт чери,
Сулалӧ да шензьӧ...
Ёді кывъяс йылысь
Гуринакӧд вензьӧ.
Гурина оз верит:
«Пӧръялӧны», — кайтӧ.
Кельчи сылы горзӧ:
«Правда пӧ, ме чайта!»
Гурина шпыньмуні,
Лӧпъяс улӧ пырис:
«Дугды пӧ, йӧй Кельчи,
Мывкыд тэнад бырис!»
Кельчи сылысь кывсӧ
Пыдди эз и пукты,
Сьӧлыштіс да шуис:
«Ачыд пӧ тэ дугды!
Тайӧ юӧр бӧрын
Веськыда ме ловзи.
Ва шӧрын ме ӧні
Некодысь ог повзьы!»
Шӧрӧ петіс Кельчи,
Бергалӧ да ворсӧ,
Вывлань-увлань ветлӧ,
Кыдзи вермӧ горзӧ:
«Ме пӧ, ичӧт чери,
Ыджыд ногӧн ола,
Гырысьясысь ӧні
Омӧля ме пола!»
Недыр еджыд Кельчи
Ветлӧдліс сідз збоя.
Сы дінӧ Сир локтіс:
«Ме пӧ тэнӧ сёя!»
Кельчи синъяс восьтіс
«Дугды, — шуӧ, — дурны.
Вӧля петӧм бӧрын
Оз позь менӧ пурны!»
«Вӧля петӧм йылысь, —
Кайтӧ Сир: — ме тӧда.
Сы понда ме тэныд
Войдӧр вӧля сета.
Курччы менӧ ачыд,
Сёй кыдз кужан менӧ.
Он кӧ вермы сёйны,
Ньылышта ме тэнӧ!»
Заводитіс Кельчи
Сёйны ыджыд Сирӧс.
Сёйӧм пыдди жугліс
Ассьыс ичӧт нырӧс.
«Вынӧй менам абу, —
Шуӧ, — ог пӧ вермы».
Чарзыны Сир кутіс:
«Ӧні ме и скӧрми!»
Восьтіс паськыд вомсӧ,
Пиньӧн вуз-вазкерис:
Ставнас еджыд Кельчи
Сылы горшас тӧрис.
Сідзи ичӧт чери
Сиркӧд спорӧ воліс,
Сідзи сійӧ ваын
Ыджыд ногӧн оліс.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator didn't fight or work for Soviet Union victory during the Great Patriotic War — so the 70-year protection term is applied;
- and the creator died before January 1, 1954 (more than 70 years ago), and has been not posthumously rehabilitated since that date;
- and this work was first published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 109 years or less since publication (if applicable).
Public domainPublic domainfalsefalse