Ыджыд лун
Коми аньяс, ме кӧсъя тіянкӧд ичӧтика сёрнитыштны Октябрса праздник йылысь.
Мый нӧ сійӧ праздникыс лоӧ? Сійӧ лунӧ лои зэв бур, нимкодь, нэмӧвӧйся казьтылантор йӧзлӧн. Сэтшӧм лунсӧ и праздничайтӧны, казьтылӧны. Босьтам ми важ праздникъяснымӧс — Ыджыд лун, Рӧштво лун, Микӧла да мукӧд праздникъяс. Ноко, думыштӧй: мый нӧ висьталӧны найӧ миянлы, мый бурсӧ, нимкодьсӧ, пӧльзасӧ миянлы сетӧны? Весиг немтор, омӧль кындзи!
Тайӧ праздникъяс пыр вичко уна сюрс во нывбабаӧс ки-кок дорӧмӧн, тюрмаын моз видзис: быд ног нывбабаӧс ылӧдліс ен нимӧн, ыштӧдліс мӧдаръюгыдӧн, мед нывбаба лёк, пон кодь олансӧ терпитіс, тюрмасьыс, дом помсьыс эз гӧгӧрво мездысьныс. Быд ног омӧльтіс, нартитіс, неморт туйӧ пуктіс.
Вайӧ жӧ думыштамӧ, колӧ оз миянлы праздничайтны, казьтывны (гажӧдчыны) сэтшӧм лёк лунъяссӧ? Ми ӧд весиг огӧ тӧдӧ, вӧвлӧмаӧсь-ӧ абуӧсь-ӧ сэтшӧм нима йӧзыс, праздникъясыс коркӧ. Сулалӧ оз нӧ сэтшӧм лунъяссӧ недель войдӧр виччысьны: чышкыны-мыськыны, пуны-пӧжавны?
Ме шуа — оз.
Ӧні сэсся босьтамӧй Октябрса праздникӧс — ноябр 7-ӧд лунӧ.
Квайт во сайын тайӧ лунӧ роч мувывса уджалысь да крестьяна мырддисны озыр йӧз киысь власьт и пуктісны Сӧвет власьт. Видзӧдламӧ жӧ, мый сійӧ власьтыс, сійӧ луныс, нывбабалы сетіс? Веськыда позьӧ шуны — ловзьӧдіс кулӧмысь. Нэмӧвӧйся дорӧм ки-кокъяссӧ мездаліс; морт ним сетіс; став закон водзас ӧткодяліс мужикъяскӧд. Быдлаӧ паськыда ӧдзӧсъяс восьталіс: школаясӧ, быд служба вылӧ, быд чинӧ, суддяӧ. Пиалӧм ныв ним, чурка ним бырӧдіс. Челядьтӧ чужтыны, быдтыны и велӧдны быд ног кокньӧдіс. Быд ног нывбабалысь олӧмсӧ вежис-кокньӧдіс, сӧмын колӧ ӧні аслыным став сетӧм бурнас кужны пӧльзуйтчыны.
Тайӧ луныс, ноябрса 7-ӧд луныс, нывбабалы медыджыд бурсӧ, нимкодьсӧ, нэмӧвӧйся казьтыланторсӧ и сетіс. Таысь ыджыд луныс сэсся оз нин тӧр! Тайӧ праздниктӧ позьӧ и недель войдӧр виччысьны: чышкыны-мыськыны, пуны-пӧжавны мудзтӧдз, сэсся сьӧлӧмысь казьтывны став бур сетӧмсӧ, сьӧлӧмысь и гажӧдчыны.
Ӧнӧдз ми, коми аньяс, тайӧ Ыджыд лунсӧ, ассьыным тюрмаысь петан луннымӧс, домысь мездман луннымӧс эгӧй гӧгӧрволӧ празднуйтны асланым пемыдлунным вӧсна. Тавосянь кутамӧ жӧ мӧд ног видзӧдны тайӧ лун вылӧ!
Сьӧлӧмсяньныд гажӧдчӧй, нимкодясьӧй ноябр 7-ӧд лунӧ!
Тайӧ луныс медся уна бур сетіс нывбабалы.
Коми ань.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator didn't fight or work for Soviet Union victory during the Great Patriotic War — so the 70-year protection term is applied;
- and the creator died before January 1, 1954 (more than 70 years ago), and has been not posthumously rehabilitated since that date;
- and this work was first published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
The author died in 1925, so this work is also in the public domain in other countries and areas where the copyright term is the author's life plus 98 years or less (if applicable), or the copyright term is 100 years or less since publication (if applicable).
Public domainPublic domainfalsefalse