Ыджыд вӧля
Кыдзи тэ, гӧль мортӧй,
Саръяс дырйи олін?
Кыдзи станӧвӧйысь,
Земскӧйысь тэ полін? —
“Омӧля, бур вокӧй,
Сар дырйи ме олі,
Быдсяма лёк понйысь
Зэв ме ёна полі.
Земскӧй вӧлі локтас,
Оз и сёрнит бурӧн,
Мужикӧс век кӧсйӧ
Сёйны ловъя юрӧн.
Воас станӧвӧйыс,
Сабляясӧн грымгӧ,
Мышкуас гӧль мортлы
Кулакъясӧн гымгӧ.
Стражник да урадник
Лолыштны оз сетны,
Видзӧдӧны толькӧ
Балябӧжӧ лӧдны.
Лесник да объездчик
Кыдзи вермӧ личкӧ,
Вый да яй, да деньга
Мужик мортлысь пычкӧ.
Уджалі ме ёна,
Шойччӧгъяс эг тӧдлы,
Сортовкаяс лэдзи,
Заводъясӧ ветлі.
Купеч да пӧдрадчик
Менсьым вирсӧ юис,
Коньӧрлысь джын нэмсӧ
Буржуй чукӧр нуис!..” —
Висьтав жӧ тэ меным,
Кыдзи ӧні олан?
Коді тэнӧ личкӧ?
Кодысь ӧні полан? —
“Ӧні ме, бур вокӧй,
Бура овны понді,
Ӧні и гӧль мортлы
Петіс югыд шонді!
Земскӧй ӧні абу,
Станӧвӧйяс быри —
Горшъяс налӧн ӧні
Век кежлӧ нин тыри!
Стражник да урадник
Быттьӧ эз и вӧвлы,
Оз нин горзы ӧні:
Ме пӧ тэныд, чӧвлы!
Лесник да объездчик
Калым оз нин ӧкты.
Вый да яй, да деньга
Ваявны оз тшӧкты!
Купеч да пӧдрадчик
Менсьым вир оз юны,
Омӧль кывъяс гӧльлы
Оз нин лысьтны шуны!” —
Важӧн-ӧ, гӧль мортӧй,
Татшӧм олӧм лоис?
Кысь жӧ тэныд, висьтав,
Ыджыд вӧля воис?
“Лоис татшӧм олӧм
Октябр тӧлысь бӧрын,
Заводитчис сійӧ
Олӧм Питер шӧрын.
Питерысь и воис
Гӧльлы ыджыд вӧля!
Кывзӧй тайӧ кывъяс
Ставныд, коді пеля!”
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator didn't fight or work for Soviet Union victory during the Great Patriotic War — so the 70-year protection term is applied;
- and the creator died before January 1, 1954 (more than 70 years ago), and has been not posthumously rehabilitated since that date;
- and this work was first published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 105 years or less since publication (if applicable).
Public domainPublic domainfalsefalse