Шӹргӹштӹшӹ сӓрӓлтӹшвлӓ

Савельева Евгения Константиновна

ШӸРГӸШТӸШӸ СӒРӒЛТӸШВЛӒ
Шӓргӓльӹм шӹргӹн ик ӹлӹштӓшӹжӹм,
тӹштӹ лиэш кечӹ мычкы шӹлмӹлӓ мадаш
дӓ янгылаш агыл.
Укшеш кечӓлтӹнӹт ыльы ӹлӹштӓшвлӓ,
кыдывлӓ лывыргы амашыштым мардеж семеш шӓргӓлӹнӹт.
Тенгеок сагашты флаг ганьы выльгыжалты тӹлзӹ,
кыды мӹлӓнем тагынамшенок шукы пӓлӹмӓшӹжӹм
ӹлӹмӓш гишӓн пачын миэн.
Ындежӹ тӹдӹ ладнан кечен ӹлӹштӓшвлӓ сага,
дӓ тамалын ӓнят мӹньӹм тымдаш кымылжы уке ылын.
Векӓт, шаналтен:
пӓлен шон мӹнь нӓрӹшкемок дӓ мӹнь гӹцем шукым,
маханьы ӱштӹ лин кердеш йыд корныштышы мардеж дӓ тел.

'''''''
Шӹргӹшкӹ ашкедӓм
ӱштӹ шӹжӹшӹ мардежвлӓ семеш.
Тӓрвӓнӓ йӓнгем
ти сарем шӹцшӹ ӹлӹштӓшвлӓ ганьы,
кынам ӓшӹндӓрем эртӹшӹ жепӹн
первишӹ корнывлӓм,
выльгыжалтеш сагашты,
но кӹрӹнжок ак вац.
Шиэш молнамшыла вӹршӓрем.
Мӹнят вет мардеж ваштареш виӓнжок ам ыл,
Но цилӓ сӹнгӓш кымыл шачеш,
кынам ылат туан дӓ яратымы сирӹштет,
кынам йӹр тинӓрӹ шукы
пуры корнышкы лӓкшӹ эдем,
мӱлӓндӹ рӹпшӓ дӓ перегӓ мӓмнӓм
ӹшке тӹрдӹмӹ шипкӓштӹжӹ.