Шӹнзӹшполкышты

From Wikisource
Jump to navigation Jump to search

Савельева Евгения Константиновна

ШӸНЗӸШПОЛКЫШТЫ

Соты мӹньӹн кидӹштем,
соты йӹрӹм-йӹр,
мӹнь кыргыжам анзыкы,
кышты землян тӹр,
кышты кушкеш
ыржа лошты кловой василек,
кышты угӹц ужам тоштым
вуйта кӹрӓток.
Вес анжалтыш,
весӹ корны,
ӓнят, мӹлӓм керӓл лит.
Ӹлӹмӓшӹштӹш ялгорны,
ӓнят, миӓ тиш,
кышты тӹрлӓт василеквӓм,
шӹнзӹн окня лиш,
кышкы шыпшеш мӹньӹм йӓнгем,
тоштым пӓлӓш пиш.
Плетон онган запон цевер,
лентӓ йиш гӹц йиш
шӹнзӹшполкыштыш ӹдӹрвлӓн.
Шӹнзӓм нӹнӹ лиш.
Мырат пишок нӹжгӓ юк дон:
тошты мыры вик...
Нӹнӹм колнет гӹньӹ,
тол йӓ тӹньжӹ мӹндӹр иш.