Шӹжӹ юр
Самойлов Владислав
Шӹжӹ юр
Тӹ юржат иргодым ӹнде эртӓ,
Шӱмӹштӓт кыце гӹнят цевертӓ…
А тагачы мӹнь ашкедм юрыш –
Келтӹмӓшӹн вӓк какляка шурыш!
Эх, цеверӹн…
Эх, цеверӹн, тӓнгем-
Кышкы вӓл шӱмемӹн ясым нӓнгем?!
Тамаок мӹлӓнем мардеж, юржы,
Тек пӹлгомын левӓш вӹкем уржы:
Ваштылам сылыкын дӓ ынгылем –
Ак керд йӧртен шӱмӹн шокшы тылым!
Шӹжӹ юрын шке шотан ялава
Корны лӓзӹртӓ… Тӹшток канава…
Мӹнь юр вашт переген кодем шотем:
Выча мӹньӹм тоныш сылык сотем…
Ма худажы мышкылт кежӹ, йоген-
Нӧртӹ, нӧртӹ шӹжӹ юрем, когон:
Ӓнят, тӹньӹ мӹньӹм лиц ыжаташ,
Ӓнят, тӹньӹм Тӹдӹ гань яраташ?
Ӓнят, трӱк, иргодым пиш юалта
Ӓнят, цӓшем, кидӹм вел шалалта
Ӓнят, мӹньын корнем эче кужы-
Мӹнь ашкедӓм, шаненок сусужым!
Эх, цеверӹн…
Эх, цеверӹн, тӓнгем!-
Шӱмеш Тӹньӹм курымешем нӓнгем!
Тӹ юржат иргодым, ужат, эртӓ,
Шӱмӹштӹ сойток, сойток цевертӓ …
Мӓ йӹвӹрт вӓшлимӹ вӓрӹштӹ
Соэш ямдымы ылына:
Тек
Коверым тӹшкӹ шӓрӹштӹ-
Мардеж вел вычымы хына.
Мане,
Тек коверым шӓрӹштӹ-
Тӹдӹ вел
Ахальы хына..
Ӹне малан мӓ
Тинӓрӹштӹ
Кӹнервурдынам пырына?!
Тек
Мардежвлӓ ивлӓм шӓнгӹштӹ
Шӹжӹм вилшӹ ӹлӹштӓшлӓ –
Пелед пӹтен гӹньӹ
Йӓнгӹштӹ,
Яшт пӹтӹде ӹлӹмӓшнӓ!
Вуйнаматан агыл ыльы
Тырын кечӹшӹ тӹгӹр
Шкӹмӹн худам ужын мыштымаш
Куштылгыжы агыл…
Погок шӓпнӹшӹ пыдыргывлӓм!
ххх
Самшудым кӹрӹн лыкташ лиэш.
А ясым?
Тӹдӹ шӱмлӓ шиэш.
ххх
Ӓшеш кычен укем, охырым,
Мамйӓ тенге мӹньӹ ойхырем?
ххх
Тӹрветшӹ – кораллвлӓ,
Пӱэтвлӓ лач жемчуг,
Сӹнзӓэт – агатвӓ,
Шӱметшӹ малын ӱштӹ кӱ?
ххх
Кенвацшым лӱктӓлӓм,
Кенвазам гӹнят.
ххх
Сусум кандаш манын,
Ясывлӓм тырхен ашкедӓм…
ххх
Тӓ ӹшке ашедӓм,
Тӓ Йымы намалеш…
ххх
Шӹлӓш агыл, а кӹньӹлӓш,
А кӹньӹлат гӹньӹ – ӹлӓш!
ххх
Попет – тӧрӹм…
Ыштет – пылем…
Шанет- иктӹм,
Попет – весӹм,
Ыштет- кымшым…
Мӹнь –
Нӹлӹмшӹ.
ххх
Улы ясышты цевержӹ,
Ясы – пурышкы кӹвержӹ.
Ӓнят, пурым жеплен, вара
Йымы ямшывлӓм ытара.
ххх
Сынзӓвӹдем дӓ сылыкем
Пӓлӓ юкдым
Йымылыкем…
Цӓшӓн лиӓм гӹньӹ,
Ма у?-
Манам мӹнь:
-Йымылан тау!