Шыр кум

by Лыткин Георгий Степанович

Шыр кум  (1889)  by Лыткин Георгий Степанович

Гижан кад: 1889, Йӧзӧдан во: 1889. Ӧшмӧс: Зырянский край при епископах пермских и зырянский язык : пособие при изучении зырянами русского языка / сост. Г. С. Лыткин. - Санктпетербург, 1889.

Ыб вылын куйлӧ вӧв юр. Котӧртіс-воис шыр, гуын олысьӧй: «Кумӧй-кумӧй! Тэ пытшкын код олӧ?» — Кодкӧ оз чукӧстчы. Шыр пондіс овны-вывны вӧв юр пытшкын.

Воис ква-ква: «Кумӧй-кумӧй! Тэ пытшкын код олӧ?» — Ола ме, шыр, гуын олысь; тэ нӧ код эм? — «Ме эм ква-ква». — Лок ме ордӧ овны. — Ква-ква чеччыштіс кум пытшкӧ; шыркӧд кыкӧн пондісны овны.

Котӧртіг воис кӧч: «Кумӧй-кумӧй! Тэ пытшкын код олӧ?» — Ола ме, шыр, гуын олысь ква-квакӧд; тэ нӧ код эм? — «Ме эм нӧрыс вылын тупыль-тапыль». Лок миян ордӧ. Куимӧн пондісны овны.

Котӧртіг воис ручӧй-чойӧй: «Кумӧй-кумӧй! Тэ пытшкын код олӧ?» — Шыр, гуын олысь, ква-ква, нӧрыс вылын тупыль-тапыль; тэ нӧ код эм? — «Ме эм быд инын уськӧдчысь». Лок миян ордӧ. Нёльӧн пондісны овны.

Воис кӧин: «Кумӧй-кумӧй! Тэ пытшкын код олӧ?» — Шыр, гуын олысь, ква-ква, нӧрыс вылын тупыль-тапыль, быд инын уськӧдчысь; тэ нӧ код эм? — «Ме эм мыр сайсянь чабырталысь». Лок миян ордӧ. Витӧн пондісны овны.

Сэк ош воас: «Кумӧй-кумӧй! Тэ пытшкын код олӧ?» — Шыр, гуысь олысь, ква-ква, нӧрыс вылын тупыль-тапыль, быд инын уськӧдчысь, мыр сайсянь чабырталысь; тэ нӧ код эм? — «Ме эм тіянӧс быдӧнӧс ляпкӧдысь». Ош пуксис вӧв юр вылас сэсся быдӧнӧс ляпкӧдіс.