Шыр катшакӧд

by Лыткин Георгий Степанович

Шыр катшакӧд  (1889)  by Лыткин Георгий Степанович

Гижан кад: 1889, Йӧзӧдан во: 1889. Ӧшмӧс: Зырянский край при епископах пермских и зырянский язык : пособие при изучении зырянами русского языка / сост. Г. С. Лыткин. - Санктпетербург, 1889.

Олісны-вылісны шыр катшакӧд. Шыр муніс турунла, тшӧктіс катшалы шыд гудравны. Катша пондіс шыд гудравны, пытшкӧсас усис.

Шыр локтіс, пондіс гольӧдчыны, горзыны: «Катша чойӧй, восьты, восьты!» Сійӧ оз восьты. Шырлы сюрис ичӧтик розь — пырис, карта ӧдзӧс восьтіс, турун додь катӧдіс, турун додь ректіс, сэсся керкаӧ пырис.

Шыр керкаӧ пырис, сёйны пондіс — катша сюрис. Сійӧ вильӧдіс катшасӧ, вадорӧ лэччис, катша пыжӧ пуксис, сьывны пондіс:

«Шыр кывтӧ-катӧ

Катша кӧя пыжӧн,

Вурд бӧж зібйӧн,

Мой бӧж лопта пелысӧн:

Лыа дорсӧ зібйыштӧ,

Кыркӧтш дорсӧ сыныштӧ».

Кӧч паныд лоис: «Шырӧй-чойӧй, лэдз менӧ» — «Ог лэдз, пыжӧй ичӧт». — «Сӧмын лапа выйта лэдз». — «Мый тэкӧд керан? Лок» Шыр бара сьывны пондіс:

«Шыр кывтӧ-катӧ

Катша кӧя пыжӧн,

Вурд бӧж зібйӧн,

Мой бӧж лопта пелысӧн:

Лыа дорсӧ зібйыштӧ,

Кыркӧтш дорсӧ сыныштӧ».

Руч паныд лоис: «Шырӧй-чойӧй, пыжад лэдз менӧ». — «Ог лэдз, кыкӧнӧсь нин — пыжӧй ичӧт». — «Сӧмын лапа выйта лэдз». — «Мый тэкӧд керан? Лок». Шыр бара пондіс сьывны:

«Шыр кывтӧ-катӧ

Катша кӧя пыжӧн,

Вурд бӧж зібйӧн,

Мой бӧж лопта пелысӧн:

Лыа дорсӧ зібйыштӧ,

Кыркӧтш дорсӧ сыныштӧ».

Кӧин паныд лоис: «Шырӧй-чойӧй, лэдз менӧ пыжад». — «Ог лэдз, пыжӧй ичӧт». — «Сӧмын лапа выйта лэдз». — «Мый тэкӧд керан? Лок». Шыр бара пондіс сьывны:

«Шыр кывтӧ-катӧ

Катша кӧя пыжӧн,

Вурд бӧж зібйӧн,

Мой бӧж лопта пелысӧн:

Лыа дорсӧ зібйыштӧ,

Кыркӧтш дорсӧ сыныштӧ».

Ош паныд лоис: «Шырӧй-чойӧй, лэдз менӧ пыжад». — «Асьным унаӧн, тэ он нин тӧр». — «Сӧмын лапа выйта лэдз». — «Лок, мый тэкӧд керан?» Ош пуксис — быдӧныс пӧрисны. Ош ӧтнас колис пондіс сьывны:

«Шыр кывтӧ-катӧ

Катша кӧя пыжӧн,

Вурд бӧж зібйӧн,

Мой бӧж лопта пелысӧн:

Лыа дорсӧ зібйыштӧ,

Кыркӧтш дорсӧ сыныштӧ».