Шудо советской выль арен ӟечкыласько (Усков)

Шудо советской выль арен ӟечкыласько Автор: Пётр Михайлович Усков

Источник: 2-тӥ номеро «Ленин Сюрес» газет (5-тӥ январе 1937-тӥ аре), 4-тӥ бам

Выль арен тӥледыз, эшъёсы, ӟечкыласько, ӟеч малпамъёсме тӥледлы вераны мон малпасько.

Колхозлэн юнматсконэз но узырлыкез урожай бордын шуиськомы, озьы бере урожаез ӝутыны сюлмаськоно, тулыс кизён азелы умой дасяськоно. Уг быдэсмы та уж кылъёсын, быдэстоно сое ужъёсын: семфондъёсыз тырмыт люкано, пудо сиён но тырмыт дасяно; плугъёсты но машинаосты чередёно, тӥяськемъёссэ ӝегатскытэк тупатъяно. Котькыӵе пӧртэм удобрениос вань, соос урожаез ӝуто валлань: гидысь кыед но гурысь пень, фосфат но томасшлак, пӧртэм сылалъёс но селитраос, торф но компост, — трос люкано соосыз, мед тырмозы кыеданы бусыосыз. Пудо сиёнэз кулэ шыръяны, уг яра сое кыедэ лёганы. Нош гидъёсты ке шуныт кариськод, тросгес кыед но люкаськод, пудо сиёнэз но шыръяськод.

Ӟеч урожай ке басьтоно шуиськомы, агротехникамылы дышетсконэз кулэ кариськомы. Толбыт асьмелы кулэ дышетскыны, урожайлэсь центнеръёссэ будэтыны. Стахановской опытъёсыз асьмелы паськыт вӧлмытоно, стахановской званиосыз трос кылдытоно. Та ужын мед кивалтоз агроном, мед валэктоз колхозникъёслы валамон.

Та вылын аслэсьтым кылбур гожъянме быдтӥсько, тӥледыз вылӥ удалтонлык понна нюръяськыны ӧтисько. 1936 ар ортчиз, асьме родинаысь ужаса улӥсьёслы со трос шуд ваиз. 1937 ар эшшо но асьмелы трос шуд вае, партия асьмедыз коммунизме нуэ.