Шондібан
Ёгор тьӧзлы,
Мукӧд йӧзлы
Часлы сьыла «шондібан»:
Кутшӧм гажӧн
Овлім важӧн —
Ньӧти лӧжтор абу тан.
Сэки уна
Вӧлі мунӧ
Курыд вина вылӧ сьӧм,
Югыд суля
Вӧлі кульӧ
Тэнсьыд дӧрӧм, гач и кӧм.
Юысь мортлӧн
Пыр нин гортын
Вӧлі мунӧ пинь да кось...
Кабак водзын
Шӧйтан-жӧдзан,
Кизьтӧм, вӧньтӧм, быттьӧ порсь.
Ёна юсян:
Чеччан-усян,
Ӧшӧдчӧма зырым, дуль;
Горшыд тырӧ,
Яндзим бырӧ:
Йӧзлысь ӧшинь... зорйӧн жуль...
Сідз кӧ олан —
Он ло колан...
Зэв кӧ вылын видзан сой —
Пемыдінын,
Пытшъяс дінын —
Чижовкаын узян вой.
Узьӧм бӧрын
Муртса вӧран,
Лёкысь висьӧ тэнад юр...
Сэсся бара
Босьтчан яра
Юны гудыр самӧкур.
Сэтшӧм юрӧн
Быд ног дуран,
Век нин вылын «ён» кулак...
Он и тӧдлы:
Ӧти-мӧдлы
Ыджыд пуртӧн сутшкан пак.
Сэки асьтӧ
Быдӧн шлачкӧ,
Потас бӧрын балябӧж,
Либӧ бокыд
Доймас, кокыд...
Сэсся ачыд жӧ и пӧж.
Лунысь лунӧ
Сідзи мунӧ —
Воӧ тэнад кулан кад...
Ёна дырӧн
Быдтор бырӧ,
Лоан ас вылад не рад.
Тэ нин тоша...
Шӧрӧ вошан —
Он и аддзыв олан туй...
Вермас лоны
Судӧ воны...
Кывсьӧ тэныд Сибыр туй...
Ёгор тьӧзӧй,
Том бур йӧзӧй,
Кывзӧй менсьым тайӧ кыв!
Лёкысь полӧй,
Бура олӧй,
Оз мӧй югды асыввыв?
Ӧні бара
Кывсьӧ карӧ:
Йӧз пӧ юӧ ид и зӧр...
Сідзӧн-тадзӧн
Дырӧн-надзӧн
Вермас важас воны бӧр.
Кыдз нӧ позьӧ
Юны водзӧ
Сэтшӧм пежтор — самӧкур?
Муса вокъяс,
Аддзӧй шогъяс!
Юӧм помысь оз ло бур.
Думышт важсӧ,
Сэкся «гажсӧ»...
Кутшӧм уна вӧлі шог!..
Шондібанӧй,
Олӧманӧй...
Омӧль вӧлі оланног.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator didn't fight or work for Soviet Union victory during the Great Patriotic War — so the 70-year protection term is applied;
- and the creator died before January 1, 1954 (more than 70 years ago), and has been not posthumously rehabilitated since that date;
- and this work was first published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
The author died in 1935, so this work is also in the public domain in other countries and areas where the copyright term is the author's life plus 88 years or less (if applicable), or the copyright term is 98 years or less since publication (if applicable).
Public domainPublic domainfalsefalse