Шог

by И. З. Суриков (1841 - 1880)

Пӧльӧн шуысь ыстіс гижӧд
Аслас пӧрысь пӧльлы.
Сійӧ пӧльӧн шуысь олӧ
Ылын карын гӧльла.
Мый бара нин сійӧ гижӧ,
Колӧ пӧльлы тӧдны.
Ачыс — велӧдчытӧм. Колӧ
Кужысь дінӧ мӧдны.
Керкась петіс кильчӧ вылас
Педот, дзормӧм юр;
Пуксис, виччысьны сэн кутіс,
Оз-ӧ лыддьысь сюр.
Рытъя кад нин сэки вӧлі,
Мӧсъяс ваян кад.
Джыньян гольгӧм кутіс кывны, —
— Сылы Педот рад.
Мӧсъяс бӧрся челядь локтӧ;
На пиын, дерт, эм
Коді пӧльлы лыддяс гижӧд, —
— Велӧдӧм юр вем.
Сідзи и лои: мӧсъяс бӧрын
Тыдовтчис бур пи.
Чукӧстіс пӧль. Детинаыд
Уськӧдчис, кыдз би...
— «На, со, лыддьы; мый тан гижӧ,
Колӧ тӧдны мем».
Босьтіс детина, зэв сюся
Лыддьӧ, тӧдӧмӧн.
Копыртчис пӧль лыддьысь дінӧ:
Кывзӧ, кутӧ лов...
Пӧльӧн шуысь сылы гижӧ:
«Метӧг, пӧльӧ, ов...
Тӧда пӧ, тэд деньга колӧ,
Вотыд мынтытӧм.
Кысь ме босьта? Больничаын
Куйла пӧ, китӧм.
Ог пӧ тӧд, кор сэсь ме пета, —
— Абу ичӧт дой:
Менам пӧ ӧд гырддза выя
Орӧдӧма сой.
Лямӧдіс пӧ уджалігӧн
Кӧльӧса борд дор...
Вердысь, отсалысь тэд оз ло, —
— Пет пӧ кӧть да кор!..
Дерт пӧ эськӧ татысь пета,
Да ӧд бара шог:
Китӧм коньӧрлы пӧ кытысь
Сюрӧ удж да мог?..»
Пӧльлы сійӧ гижӧд вайис
Бура ыджыд шог;
Зэв тай чорыда пӧль бӧрддзис,
Кага бӧрдӧм ног...
Детинаыд аддзӧ бӧрдӧм,
Сьӧкыд сылы тшӧтш:
Пӧльлӧн сьӧлӧмас шог пырис,
Гилявмис вом кӧтш.
Пӧль моз, ӧшӧдіс тшӧтш улӧ
Еджыд шабді юр.
Шорӧн синва бур пи лэдзис,
Мыйла вӧлі бур.

This is a translation and has a separate copyright status from the original text. The license for the translation applies to this edition only.
Original:
Translation: