Шемӧс олӧм
Микунь сиктын кулак пыкӧд —
Выйим Гриша Степан Вань;
Тӧвбыд норма босьтӧ (тшыг ӧд!),
Ассьыс вузалӧ пыр нянь:
Няньсӧ вежӧ ситеч вылӧ,
Мортӧс тӧдлыны оз чайт.
Кодлысюрӧ гусьӧн сьылӧ:
— Вай пуд няньысь квайта шайт.
Август тӧлысь — няня тӧлысь,
Ваньлы норма нянь эз шед;
Вирыс пузис Ваньлӧн вӧлись:
— Коді норма мем эз сет?..
Мир туй вылӧ зорйӧн петӧ:
— Аддзам мыжа мортӧс сэн...
СИК-са шленӧс аддзӧ — шӧтӧ:
— Ме ӧд тэнад ловлӧн ен!
Ойзӧм, горзӧм, шняпкӧм кылӧ...
Чукӧрмисны сиктса йӧз.
Ваньлысь шургасны зор ылӧ,
Лӧньӧдасны пуан грӧз.
* * *
Тыдор сиктын сё дас овмӧс,
Норма босьтӧ сё да вит.
Озыр йирӧ гӧльлысь сьӧмӧс
Да сы пыдди... оз ӧд „вид“.
Норма юклан шленъяс гӧльӧсь,
Сӧмын выйим полан ру —
Паныд озыр йӧзлы, збыльысь,
Паныд кывтӧ морт оз шу.
Паныд петан озыр кыйдӧ...
Гортын век ӧд он ов, дерт,
Норма ставлы ӧтмоз пайдӧ,
Озырӧс мед тшыг оз берт.
* * *
Айкатыла ас визь нуӧ...
Озыр зэвтӧ ассьыс вез —
Гӧль йӧз кулак тывйын жуӧ,
Мездӧм йылысь абу кыв.
Партъячейка шкоргӧ-узьӧ —
Аддзӧ гажа мича вӧт:
Мир гӧрысьлӧн сурыс шузьӧ,
Гӧльыд — кӧма, пася, пӧт;
Мича дзоридз лэбзьӧ, усьӧ,
Сӧмын зептад лӧд да лӧд.
Озыръяслӧн уджыс пузьӧ, —
Гӧльӧс кыйны шедӧ ӧд.
Сӧвет бӧрйӧм дырйи самӧй
Кулак индӧ кандидат:
— Тайӧ мортыс зіль да прамӧй,
Мортлы оз ло сват ни брат...
Кияс кыптӧ... Шуны паныд
Мортлӧн оз песовтчы кыв;
Актив, асьтӧ кӧть эн янӧд,
Кулак сынӧдсӧ он ньыв!..
* * *
Эз на помась тайӧн — водзӧ...
Сувтӧ ставнас Ватӧй сикт.
Кузь (кыв) Степан гӧтыр вӧчӧ
Озыр индӧм серти дзик:
— Ставныд ӧткодь... Ставлы норма!
Коді тані баяр морт?
Онӧ сетӧй — скӧрма, дзорма —
Аддза татысь мунны горт.
Емдін, вочакывтӧ висьтав,
Мыйла тайӧ мунӧ тадз?
Узян бокыд эз на письтав,
Партъячейка? Он-ӧ нач,
Тайӧ мича уджъяс кузя,
Горзігтырйи ура „гох“?..
„Югыд туй“ видзӧдӧ сюся,
Оз-ӧ тэнад пыкты бок.
Могъяс ыджыд тіян водзын:
Весны ойбыр, орӧсь син...
Озыр йӧзлы — гӧль йӧз козин, —
Ставыс мый нӧ эз на ин,
Унджык нӧшта колӧ сетны,
Озыр йитӧд мед оз чег, —
Гӧльӧс бала вылӧ зэвтны
Кӧсъяд ставсӧ ӧтитӧг?..
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator didn't fight or work for Soviet Union victory during the Great Patriotic War — so the 70-year protection term is applied;
- and the creator died before January 1, 1954 (more than 70 years ago), and has been not posthumously rehabilitated since that date;
- and this work was first published before January 1, 1954 (more than 70 years ago).
The author died in 1947, so this work is also in the public domain in other countries and areas where the copyright term is the author's life plus 76 years or less (if applicable), or the copyright term is 94 years or less since publication (if applicable).
Public domainPublic domainfalsefalse