Маҡтана тип уйламағыҙ,
һөйләмәйем маҡтанып:
һөнәрлеләр бик күп беҙҙә,—
Әйтәм быны шатланып.
"Ҡыҙыҡ фокустар күрһәтә —
Маһирлыҡ бар Ғаянда.
Гәүһәриә ҡумыҙ сиртә.
Барый уйнай баянда.
Илдус, Илшат, Илһам, Илдар,
Зариф, Мәғариф, Урал...
Кемдән һораһаң да әйтер:
«һәйбәт ҡурайсы улар!»
«һандуғас» тип йөрөтәбеҙ —
Сара йырлай бик матур.
Мандолинала шәп уйнай
Наил менән Биктаһир.
Кем оҫта бейей, тиһәгеҙ,—
Сәлимә менән Дилә!
Минең дуҫым Ғайса хатта
"Ҡош булып һайрай белә!
Талип тальян гармун тарта,
Фәһимә — һүҙ оҫтаһы...
Концерт әҙерләгән саҡта
Бер кем тормай ҡыҫтатып.
Әйтмәй ҙә торам: бергәләп
Концерт ҡуйҙыҡ кисә беҙ.
Көткәндән дә күңеллерәк
Килеп сыҡты кисәбеҙ.
— Рәхмәт!— тине ауылдаштар,—
Кисәне бик оҡшаттыҡ!..
Башҡаларға шатлыҡ биреү
Үҙе бит ул ҙур шатлыҡ!
