Алабго кар вадесын,
Паськыт, бадӟым Кам яр дурын,
Вашкала тырысь башня сылэ,
Кудекысен ик со адӟиське.
Кинлы башня кулэ луэм,
Ӧвӧл ӟечак тодӥсьёс;
Марлы, сое кин лэсьтэм,
Уг тодо сое Алабгоос.
Удмурт калык со башняез,
«Шайтан черык» шуса нима.
Нылпиезлы со черыкез
Шайтан лэсьтэм шуса вера.
Пуп шайтанэн кушласькыса,
Ог пол споре пе пыриллям;
Вить бутулка вина юыса,
Тазьы кенеш лэсьтӥллям:
«Уй куспын черык лэсьтӥд ке,
Нылме сёто» — пуп шуэм,
Атас чоръятозь вуттӥд ке
Эмес пи луод тон мыным.
Пупен уно вераськытэк,
Шайтан черык лэсьтын куськем
Пичи но ӝегатӥськытэк,
Бадӟымесь изъёс со нулдэм.
Пидэс синьмаз усено кадь,
Сюро-быжо тырше пе,
Пуплэсь нылзы сионе кадь,
Со яратэ вылэм пе.
Уд-а нош алда чаляк пупез,
Со сюролэсь но шаплы вылэм;
Атасъёсыз кулэ дыръяз,
Чоръятыны тодэ вылэм.
Ини липетан куськем,
Шайтан туж шумпотыса,
«Ку-ку-ре-ку» кылӥськем
Кам куза шуккиськыса.
Шайтан бырем; черык кылем,
Ӝужыт яр дуре сылыны!
Пуплэн нылыз со арик бызем,
Аслаз гажан «малпанэзлы»…