Числаез ыштӥллям (Коньы)

Числаез ыштӥллям Коньы псевдоним улсын печатламын

Поттэмын: Гудыри : газет. — 1924. — № 23. — 3-тӥ бам.

Числаез ыштӥллям

Туала мадь

Кык попъёс вылӥллям. Одӥгез вуж поп — вуж черкысь, мукетыз выль поп — выль черкысь. Одӥгез вуж числаен вӧсяське, одӥгез — выль числаен.

Потӥз вуж поп корка азяз, черекъя выль поплы:

— Тон мыдлань вӧсяськиськод, мон тонэ черке пыраны уг лэзьы!

Выль поп но корка азяз потӥз, черекъя вуж поплы:

— Тон ачид мыдлань вӧсяськиськод! Тон вуж числа, контрреволюция тон!

Ӧтиз выль поп черк сторожез, вера солы:

— Мын, Прокопей, черк йылэ, гырлы шуккы, вань калык черке мед лыктоз. Мон обедня вӧсяло Рождество понна выль числаен…

Кутӥз вуж поп йырсизэ выль поплэсь, сэзъя сое:

— Тань тыныд, антикрис… тань тыныд, еретик… Дугдыты гырлыез. Рождество 25-тӥ декабре луэ, тон 13 нуналлы вазьгем сое вӧсяны турттӥськод!..

Прокопей черк йылын эктыса-эктыса вань гырлыез ӵош жуге.

Мозтӥськиз выль поп вуж поп ки улысь, кузь-кузь вамышъяса, черке мынӥз, пыриз шонерак алтараз. Вите калык лыктэмез. Черке лыктӥсь нокин ӧвӧл.

Семон песяй азбараз потэм вал. Гырлы жугемез кылӥз но губыр-губыр черк пала вамышъяз. Пумитаз Гаврила песяй тупаз.

— Кытчы-о ыӵе дыртӥськод, Семон песяй?

— Черке мынӥсько, вӧсяськыны.

— Эн ветлы, Семон песяй, иньмарлэн вожез потоз.

— Ма, марлы-о вожез потоз? — абдраса юа Семон песяй.

— Ма, уд тодӥськы-а, Семон песяй, выль поп выль числаен вӧсяськын косэ. Туннэ лымбыт вӧсяськид ке но, инмар уз кылы, вӧсяськемед падитэм луоз.

Люкаськизы пересьёс черк азе, пушказ пырыны кышкало.

Потӥз соёс доры черк сторож Прокопей, ӧте соёсыз:

— Марлы-о уд пыриське черк пушкы. Батюшка вите, чаль пыре!

— Ум пыре, мед витёз, ужез ке ӧвӧл. Со мыдлань вӧсяське. Тодӥськод-а, мар числа туннэ: выль числа-а, вуж-а? Выль числа кулэ ӧвӧл милем.

Вуж поп, тае адӟыса, улӥз: шумпотэ, тушсэ маялляса, ас понназ вераське: «Мон вӧсяськын кутски ке, вань калык поп доры черке люкаськоз. Мон шонер поп, вуж числаен вӧсяськисько».

Калыклы бадӟым малпаськон луиз. Адямиос кудӥз кызьы, кудӥз кызьы вераськын кутскизы. Пересь кышноёс но ымзэс усьтӥзы, ог-огзылэсь юало: мар каром на табере, кызьы вӧсяськоно, кудӥзлэсь поплэсь кылзоно. Ку табере визянлэсь^[1] дугдоно? Азьло 13 нунал кемагем визяно вал, табере 13 нунал азьлогем дугдоно. Кытысь потӥз со 13 нунал?

Онисим песяй, 60 арес маке, та вераськемъёсыз кылӥз, кулонзэ малпаса, тазьы ӝожтӥськиз:

— Секыт аръёс вуизы. Кык попмы вань: огез озьы, огез тазьы шуэ. Мыным кулыны но эрик уз луы. Кудӥз табере поп, кулэм берам, монэ вӧсялоз. Вуж поп ке вӧсяз, 13 нунал вазьгем басьтоз. Суразы та попъёс асьмелэсь йырвизьмес.

Мукетьёс но озьы ик шуизы:

— Суразы, суразы… дунне бырон вуэ ини та…

Адӟизы пересьёс: горд салдат отӥ урам кузя кошке, юало солэсь:

— Вера али, пие, кызьы табере милем вӧсяськыны кулэ: выль числаен-а, вужен-а.

— Вӧсяське, ужды ке ӧвӧл, выль числае но, вужаз но: мон одӥгаз но уг вӧсяськиськы. Мынам солэсь ӟечгем уже вань.

Йыркур луизы пересьёс, неномыр ӧз вералэ.

13 нунал улса, черк сторож Прокопей нош ик гырлы жугиз. Та нуналэ вуж поп Рождество понна обедня вӧсяны черкез усьтӥз. Шумпотыса со черке пыриз но, отчы нокин ӧз лыкты. Огназ со черкын бӧксӥз но, йырзэ ошыса, гуртаз бертӥз.

Пересьёс урамын (ульчайын) верасько: ненокинлы но туэ оскыны уг луы. Коммунистъёс инмар ӧвӧл шуо. Попъёс числаез ыштӥллям.

Вӧсяськытэк улом, оло, умойгем луоз.

Валэктонъёс

1. Визян — пост, кӧс возён