Черк гырлы (Красильников)

From Wikisource
Jump to navigation Jump to search
Черк гырлы
Автор: П. Красильников
Источник: Гудыри : газет. — 1924. — № 24. — 4-тӥ бам.


Черк гырлы


Арня быдэ, ӵукна,
Шулдыр ӵук куазьёсы,
Вӧлме гырлы куара
Пеймыт гурт вылъёсы.

Вӧлме ук гырлылэн
Сыръясь тулкымъёсыз,
Шудэ ук калыклэн
Оскись сюлэмъёсыз.

Гырлы! жонгетэмед
Мыным но кылӥське,
Урод куараосыд
Сюлме ик куртчиське.

Сюлме куртчиськыса,
Вае пинал дырме:
Сётэ, возьматыса,
Азьло улэмъёсме.

Ӵок, пинал дыр кошкиз,
Уз ни берыктӥськы
Инмар кылъёс вунӥз,
Уг ни, уг оскиськы!

Уло мон, тыршыса,
Инмарлы оскытэк,
Тодонлык тырыса
Песьтэрам, кышкатэк.

Инмарлы оскыса,
Ӟеч улон ӧй басьты,
Сюлмысь вӧсяськыса,
Ас шудме ӧй адӟы.

Инмарлы оскыкум,
Визьмо луэм нерге,
Улӥсько вал гуртын
Жыктыса сэреге.

Табере тодонлык
Мыным сюрес сётӥз,
Инмарлы оскытэк
Ӟеч улон возьматӥз.

Гырлы! эн жонгеты!
Кушты пӧяськондэ!
Эн сӥла калыклы
Ӧвӧлтэм инмардэ!