Чавайн - Куэ

From Wikisource
Jump to navigation Jump to search

Сергей Григорьевич Чавайн

Куэ


Куэ! Мый тыйым пеш йӧратенам,
Садлан портем воктене шынденам,-
Ниго деч ончыч шошым ужаргет,
Ниго деч ончыч шыжым чевергет.
Чыла пушеҥгылан ой пуышо,
Чыла пашам, ойгем тый ужшо, куэ, улат!
Изи чоҥгаште тыйым кукленам,
Вара, конден, тышакын шынденам.
Вӱд оптымем ден тыйым иландарышым.
Тый кушкыч, кугу лийыч, куандарышыч
Изергын чонжым. Мый ӱмылыштет
Первый урокым тунемам ыле,
Тунем ом шукто да шортам ыле,-
Чылажымат тый тудым шинчет вет,
Чыла ужынат!
Куэ! Мый кызыт тыйым ончалам,
Изи годсек сайракын шоналам...
Тый адакат лият чот кугурак,
Тый адакат лият чот сылнырак!
Тунам вара ӱмылыштет шинчен 
Ом керт. Тый тунамат, ончен-ончен,
Ӱмылышкет канаш сай еҥым пого,
Укшетым шаралтен, сылнештын шого!