Чăваш
| Чăваш (1907) by |
| Хайланă дата: 1907, Пичетленĕ çул: 1907. Çăлкуç: Вула Чăвашла |
Ăçтан тухнă эс, чăваш,
Кам пулнă сан аслаçу?
Кирек ăçтан эс «не наш»,
Кирек ăçтан ятлашу,
Усал сăмах илтсен эс,
Тата, хăш чух, лаша пек,
Чылай патак çиен эс.
Пăхсан, эс те этем пек:
Этем пекех тăхнатăн,
Этем пекех çиетĕн;
Çын пек суха тăватăн,
Çын пек вăрçа çÿретĕн,
Çапах сана хисеп çук,
Пĕрмай эсĕ ларчăкра,
Кирек ăçтах эс «Ванчук»,
Кирек ăçтах тарçăра.
Мĕншĕн эсĕ кăшт пăртак
Шухăшласа пăхмастăн?
Мĕншĕн эсĕ тăм ашак,
Мĕншĕн куçа уçмастăн?
Кала халĕ, мĕн пур сан?
Аслă школсем пур-и сан?
Театрсем пур-и сан?
Праход-лодка пур-и сан?
Кĕнекÿ те тахçанах
Тирĕс çинче çĕрнĕ сан.
Тăм-ухмах эс, тăм-ухмах.
Этем пулаймĕ санран.
Пăртак асли пуçлисем
Çĕн кĕнеке кăларчĕç.
Ун çинелле, путсăрсам,
Çаврăнса та пăхмарĕç.
Каллех санăн кĕнекÿ
Тирĕс айне вăрăнчĕ.
Вăл пулнăччĕ сан ÿпкÿ,
Вăл сан чуну пулнăччĕ.
Унпа сывлăш çавраттăн.
Пуçна чылай уçаттăн,
Ĕнтĕ каллех пăчăхрăн,
Хура куçлăх тăхăнтăн.
Пĕрмай кун пек пурăнсан,
Чисти пĕчĕк эс, чăваш.
Ĕçпех тинкÿ тухĕ сан.
Пушшех пулăн, эс «не наш».
Мĕскĕн чăваш этемми,
Мĕншĕн санăн пуç мими
Çын мими пек вылянмасть,
Мĕншĕн хăйшĕн тăрăшмасть?
Кала, кама шанан эс?
Е турăран кĕтетне?
Ăнлан, турă пит йĕмест;
Пĕлет хăйĕн пĕлетне.
Малтан пултăр сан кăмăл, –
Вара килсе парĕ вăл.
1907
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator didn't fight or work for Soviet Union victory during the Great Patriotic War — so the 70-year protection term is applied;
- and the creator died before January 1, 1954 (more than 70 years ago), and has been not posthumously rehabilitated since that date;
- and this work was first published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
The author died in 1949, so this work is also in the public domain in other countries and areas where the copyright term is the author's life plus 74 years or less (if applicable), or the copyright term is 116 years or less since publication (if applicable).
Public domainPublic domainfalsefalse