Цырыхъ æмæ къалос (Гæдиаты)

by Гæдиаты Секъа

Цырыхъ æмæ къалос  (1911)  by Гæдиаты Секъа

Фыст датæ: 1911, Рауагъ аз: 1911. Равзæрæн: Гæдиаты Секъа. Уацмыстæ. Дзæуджыхъæу : Ир, 1991

ЦЫРЫХЬ ÆМÆ КЪАЛОС

Цырыхъ загъта къалосæн:
— Сымагæй бæстæ марыс-
Уый дæм хæссын аххосæн, —
Дæхи сыгъдæг нæ дарыс.

Къалос загъта цырыхъæн:
—Хæрзгæнæг хорз кæм ары...
Хорз мын фæдæ иу мыхъхъæн,
Дæ уайдзæф мæ фæмары.

Куы бацæуыс хæдзармæ, —
Уым гауызтыл фæхъазыс,
Нæ фæкæсыс де 'мгармæ,
Мæн фæсдуар ныууадзыс.

Æз дæ дарын сыгъдæгæй,
Уый куы зонис, уæд бæргæ
Уæд нæ дзурис тызмæгæй,
Нæ мыл кæнис хъæртæ.

---