Цард (Гæдиаты)

by Гæдиаты Секъа

Цард  (1911)  by Гæдиаты Секъа

Фыст датæ: 1911, Рауагъ аз: 1911. Равзæрæн: Гæдиаты Секъа. Уацмыстæ. Дзæуджыхъæу : Ир, 1991

ЦАРД

Мæгуырты цард куыд ыстауаем, —
Хъæбæр кæрдзын цæххы тулынц;
Хъæздгуыты цард куыд ысфауæм, -
Нард физонæг хъармæй курынц.

Хъæздыг адæм зæрдæрухсæй
Алы райсом цай нуазынц,
Мæгуыртæ та зæрдæхусæй
Ихджын донæй сæ ком уадзынц.

Хъæздыг адæм сæ кæрцытæй
Тъæнджы мæйы сæхи стауынц,
Мæгуыртæ та бæгънæджытæй
Уазал къуымты хæрдмæ хауынц.

Хъæздыг адæм сæнæфсæстæй
Хъарм хæдзæртты хъæрæй зарынц, -
Мæгуыртæ та фырыссæстæй
Сæ былалгъыл кæуын дарынц.

---