Едгъажьэмэ, бэрэ Ӏумахуэт,
Къигъэзэжмэ, ди махуэгъитӀт!
Ар езыри хэтхэ ящыщ жыфӀэмэ -
Хьэтх гъуазэм и къуэкӀэ ди Мыхьэмэтт!
Сэ зы махуэкӀэрэ уэ укъэзгъуэтыжтэмэ,
Сабий джанэншэхэм захуэпэжынт!
Зи пщӀэгъуалэр къуршыщхьэм щызекӀуэ,
Зи зекӀуапӀэри зи гупсысапӀэ!
Ар езыри хэтхэ ящыщ жыпӀэмэ, -
И къуэ закъуэкӀэ ди Мыхьэмэтт!
Езы Алыхьым сэ укъызитыжтэмэ,
Бжьыхьэ жэщ кӀыхьыр жеипэ закъуэкӀэ уэзгъэкӀунт!
Махуэр хъумэ, гъыбзэр соус,
Жэщыр хъуамэ, согузэсэж,
Ар зи закъуэмэ сытхэр и махуэ,
Хьэтх гъуазэм и къуэкӀэ ди Мыхьэмэт!
Сэ зы махуэкӀэрэ уэ укъызитыжтэмэ,
Данэху-данапӀэу си пӀэ щӀыжыгъэм ущызгъэжеинт!
Сэ уи унэм сыщӀумыгъэсыми,
Сэ уи хьэщымэ зыщызгъэлӀэнут!
Ар езыр хэтхэ ящыщ жыпӀэмэ, -
Хьэтх гъуазэм и къуэкӀэ ди Мыхьмэтт!
Алыхь, алыхь, сэ укъызитыжтэмэ,
Данэху-данапӀэу си пӀэ щӀыжыгъэм ущызгъэжеинт!
Брулыжьыр бэрыжьеяфэт,
Ар зи афэри бдзапцӀэшэ Ӏунэ?
Ар езыри хэтхэ ящыщ жыпӀэмэ, -
Хьэтх гъуазэм и къуэкӀэ ди Мыхьэмэтт!
Ар зы махуэкӀэрэ сэ укъэзгъуэтыжтэмэ,
Ди мэжэщӀалӀэхэм загъэнщӀыжынт!
Зи анэжьыр щхьэлъащӀэ уэс,
Зи щуӀэгъри бгъафэ чэсей,
Ар езыри хэтхэ ящыщ жыпӀэмэ, -
Хьэтх гъуазэм и къуэкӀэ ди Мыхьэмэтт!
Сэ зы махуэкӀэ уэ укъэзгъуэтыжтэмэ,
Добракъыбгъэурэ бжьэубгъэ быдзым ущызгъэжеинт!
Зи шыпхъу цӀыкӀур зыхуэбзэгуфӀэ,
ЩуӀэгъэфӀри зыфӀагъэкӀуэд!
Ар езыри хэтхэ ящыщ жыпӀэмэ, -
Хьэтх гъуазэм и къуэкӀэ ди Мыхьэмэтт!
Сэ зы махуэкӀэрэ уэ укъэзгъуэтыжтэмэ,
Данэху-данапӀэм ущызгъэжеинт!
Дзажэжьхэр зыхуагъэхъыжьэ,
Фо махъсымэри зыхуагъэжабзэ!
Ар езыри хэтхэ ящыщ жыпӀэмэ, -
Хьэтх гъуазэм и къуэкӀэ ди Мыхьэмэтт!
Сэ зы махуэкӀэрэ уэ укъызитыжтэмэ,
Бжьыхьэ жэщ кӀыхьыр жеипэ закъуэкӀэ уэзгъэгъэкӀуэнт!
Индылыжьым и нэр къыщопкӀ,
ЗэпрокӀри шыбэр къреху!
Ар езыри хэтхэ ящыщ жыпӀэмэ, -
Хьэтх гъуазэм и къуэкӀэ ди Мыхьэмэтт!
Езы Алыхьым сэ укъызитыжтэмэ,
Мы дуней зылӀти узизгъэӀэнт.
Зи пщӀэгъуалэр нэзкӀапэщӀэплъ,
Зи щуӀэгъэм хуемыплъэкӀыж!
Ар езыри хэтхэ ящыщ жыпӀэмэ, -
Хьэтх гъуазэм и къуэкӀэ ди Мыхьэмэтт!
Алыхь, алыхь, сэ укъызитыжтэмэ,
Сабий джанэншэхэм захуэпэжынт!
Зи пщӀэгъуалэр къуршыщхьэм щыджэгу,
Хур хъыджэбзхэр зи дэджэгуэгъу!
Ар езыр хэтхэ ящыщ жыпӀэмэ, -
Хьэтх гъуазэм и къуэкӀэ ди Мыхьэмэтт!
Сэ зы махуэкӀэ уэ укъызитыжтэмэ,
Мы дуней зылӀти узизгъэӀэнт!
БланэшкӀэхэр зи хьэщӀэныш,
Бланэшэхэр зи Ӏэпэшыпс!
Ар езыри хэтхэ ящыщ жыпӀэмэ, -
Хьэтх гъуазэм и къуэкӀэ ди Мыхьэмэтт!
Езы Алыхьмэ сэ укъызитыжтэмэ,
Мы дуней зылӀти узизгъэӀэнт!
Зи пщӀэгъуалэр данэ сокупцӀэ,
Зи афэр бдзапцӀэшэ Ӏунэ!
Ар езыри хэтхэ ящыщ жыпӀэмэ, -
И къуэ закъуэурэ ди Мыхьэмэтт!
Сэ зы махуэкӀэрэ укъызитыжтэмэ,
Данэху-данапӀэурэ си пӀэ щӀыжыгъэ ущызгъэжеинт!