Фæдзæхсын (Гæдиаты)

by Гæдиаты Секъа

Фæдзæхсын  (1906)  by Гæдиаты Секъа

Фыст датæ: 1906, Рауагъ аз: 1906. Равзæрæн: Гæдиаты Секъа. Уацмыстæ. Дзæуджыхъæу : Ир, 1991

ФÆДЗÆХСЫН

Фæстæгтæн æз фæдзæхсын
Мæгуыр ирон чиныджы.
Ма бауадзут рæмыхсын
Иры бындар иунæджы.

Уе 'вдæлон сахат иууыл
Рох ма кæнут ирон дзырд.
Кадджын фыдæлты риуыл
Ыскæндзыстут номы цырт.

Денджызы астæу нæ мыггаг
Куы фесæфа — тæссаг у.
Ма рох кæнут уæ хъуыддаг,
Хъуаджы бæх хæссаг у.

Мах фæкуыстам цыдæртæ,
Сау бындз галæн æмбалау,
Радтæд хуыцау æндæртæ,
Куыд рухс кæной цырагъау.

---