Янгамо (2006)/Ушодкс ды пе
| ←Седеень лазкс | Ушодкс ды пе (2006) by , edited by Рябова Л. А. |
Вастовома→ |
| Нуянь Видяз. Янгамо. Келей ёвтнема, ёвтнемат, тешкст. — Саранск ош, 2006. — с. 145—151 |
[145]
| УШОДКС ДЫ ПЕ |
Чись ёрвалдынзе налонзо кудонть каршо кувтолдыця эрьксэнть ды мизолдозь валгсь оймсеме. Туемстэ инзей тюссо кирвазтизе менель чиренть. Аняй вансь вальмава те мазычинть лангс, ды сонсь яла арсесь школасо ютавтозь течинь чиденть. Эрькенть велькссэ Якстерть мериця артовксонть пачк неявсть тензэ тонавтыцянзо ёвтниця турватне, марявсь чевте, мелень кепедиця вайгелезэ, аштесь икелензэ превей вановтозо.
[146] Варштась течи «а» букванть сёрмадовксонзо лангс ды ашо чевте кедьсэнзэ вадяшизе Аняень прянзо. «Пре-вакшат, тейтерне, васолга сравтовить эрямонь кить-янот», — мерсь тошказь ладсо ды ютась партатнень кувалт седе тов, удало аштицятнень ёнов.
Аняй сась васенце классос кавтошка ковдо икеле. Сон мельспаросо тейнесь тетрадезэнзэ ушкс нерькст, букват, кикст. Вечкевсь тензэ те. Ялганзо вастовсть неть «унжинетнень» марто ансяк школасо. Аняень тевензэ лиятальть: сон уш вете иесэ, патянзо лангс ванозь, тонадокшнось ловномо ды ловнось эрязасто. «Теке керь лангс реве лодордат», — мериль тетязо, зярдо Аняй саиль книга, озыль лембе голландканть ёжос ды ушодыль ловномо. «Каня лия валот арасть? — мекс-бути покордавиль авазо. — Мезть кортамс, Аняйнень уш кавксо, покш тейтерь...»
Ютась се мазый менель чокшнеденть мельспаросо ледстнематнеде мейле ков, мельганзо омбоце.
Шказо талаень сёксь. Умок каизе палянзо Кедяронь икеле килеесь, умок кадызь чачома масторост вирень-паксянь нармунтне. Якшамо. Тарькс. Уштнемс сави эрьва чистэ. Уштнемс удалце ды икельце кудонтькак.
Тейтернесь теинзе уроконзо ды озась вечкевикс тарказонзо — лембе ёжо голландканть ваксс. Ловнось эсензэ пачка. Ансяк лиясто, кодамояк ачарькодевикс вал марто вастовомсто, сон эстензэ марямга, пельксэнь-пелькс эскелясь те «пупорьксэнть» трокс. Кудосот весе: авазо, лелянзо-патянзо, уряжозо. Эрьвась котьмась эсь тевсэнзэ. Арасель ютксост ансяк тетязо. Сон пиресэль.
Весемеде пек седейс педиця ды мельс туиця тарканть ловномсто апак учо панжовсь кудо кенкшесь, ды ладор-калдор совасть вете-кото цёраломанть.
Аняй нолдызе книганзо кумажа лангс ды варштась асодавикс ломантнень ёнов. «Кить неть?» —чачсь превсэнзэ. Мекс-бути жуйть мерсь седейнезэ. Сынь мезеяк берянь эзть тее, берянь вал эзть ёвта. Мекс эно, косто саевсь те апаро ёжось? Редизе тейтернесь сеньгак — совицятнень ютксо ульнесть кавто милицият. Сынь явовсть оршамопельсэст. Лиятне тензэ марявсть ве понань, чамасткак ёнов мольсть. Кода илязо уле, эйстэст вейкенть содызе. Сон вастневсь тензэ школав якамсто вельсовет икельде. Те ульнесь Аржаень Паксяз — вельсоветэнь прявтось. Веленек содасызь, марсесь вишка Аняйгак: кавтошка иеде икеле сон иредьстэ прясо маштокшнызе нинзэ, мейле зярс-бути аштесь тюрьмасо, ней вана — велень прявт. Истят валткак Аняйнень савкшнось марсемс: те прявтонть мокшнанзо — кшнить.
[147] Икельце кудосонть валдо. Тей ютамсто Паксяз апаро вановтсо варштась пазаватнень лангс, чикорк мерсть пеензэ. Озась эземпес. Серьгедевтизе кудазоронть.
— Я, тесэ инжеть! — совамсто та-кода а эсь вайгельсэ пшкадсь Терюш ды каиксэлинзе суманензэ.
— Инжеть, инжеть... — набойстэ мерсь Паксяз.— Ютак, Терюш леляй, тей. Кортнемс эряви, — цяр пурьгинень вайгелезэ пештизе кудонть.
Терюш сеске чарькодсь, кодат «кортамот» учить эйсэнзэ. Валдо вадрясто ледстнесть сындест кенкшенть икеле орта палманькс аштиця милиционертнэ.
Цёрась ютась икелев ды апак кайсе озась стуворонть омбоце пес. Каршонзо — кирьпець тюс чама Паксяз. Сон педявтызе вановтонзо азоронть сельмс ды налксесь суронзо ютксо карандашсонть.
— Ведькеветь ули? — ульнесь васень кевкстемазо, куш, кода эсест велень ломань, теде содась.
— Ули. Мейле мезе? — апак пеле мерсь Терюш каршонзо аштицянть лангс ванозь.
— Кевкстницясь тесэ мон, — каясь вал Паксяз ды тейсь та-кодамо тешкске конёвозонзо.
— Пенгедемат ули?
— Ули, — эзь карма пелькстамо Терюш.
— Оень лепштнемат ули?
— Ули.
— Скалот кавто?
— Кавто.
— Лишметь зяро?
— Колмо.
— Монь данноень коряскак — колмо, — кевкстницясь эрьваксть путнесь конёвозонзо чекине. — Тонь ловтано кулакокс. Содак теде. Ней вана мезе, пурнадо-сэрнядо ды саеде мартонк кинень зяро кандови. Кильдевтьсынек лишменк, ды часонь-кавтонь ютазь — станцияв.
Терюш чатьмонсь. Содась, вармань каршо сельгенемадонть лезэ а ули. Ансяк кевкстсь:
— Вензэ лангс?
— Куш валскензэ лангс, — пеедькшнезь-нарьгазь мерсь вельсоветэнь прявтось. — Кавтошка часонь ютазь уледе анокт! — неть валтнэнь ёвтазь стясь, лисиксэль кудостонть.
Аватне бувсо лайшезевсть. Марявсь, стенатнеяк сорнозевсть рангомадост. Лайшесть эрдекстазь. Весемеде пек, верьга вайгельть, лайшесь ды сеересь Аняень уряжозо — Килея.
Мезеяк эзь лисе. Увтось-шалтось седеяк виевгадсь, теке нешке сорновтовсь.
Терюшень мелензэ-арсеманзо колынзе цёразо, Аняень покш лелясь. Авань сельведтнеде ды сюдоматнеде эзь кирдеве. Мезе лангскак апак вано, каявсь прявтонть лангс, кундась пальтонь сивезэнзэ. Недявсть. Чийсть орта палманькс аштиця милиционертнэ ды лиятнеяк. Кепететсь булга. Окойники явизь. Терюшень цёранзо сюлмсизь.
— Кодаткак часонь ютамот арасть. Нейке лиседе. Кулаконь чиненкак илязо кадово! — сеедьстэ лексезь рангстась «кулаконь» вешницясь. Кежтнеде якстере чамазо седеяк якстерьгадсь, сельмензэ полгарьгадсть. Кедензэ сорность. Эзь сода мезе теемскак. Чийсь икельце вальмантень. Панжиксэлизе — эзь панжово: путнезельть уш омбонст вальматнеяк. Седеяк азаргадсь. Кедензэ малас косто а косто понгсь узере. Жой! — каятотсь эшкемадонть ды певериця сулика пелькстнэде.
Кувтань-кувтань совась кудонтень якшамо, теке телень, кошт. Кудоюткось сеске ёмавтызе урядчинзэ.
— Тынь мень па... вандадо?! — пижакадсь Паксяз лездыцянзо лангс ды васенцекс ёртызе тапазь вальмаванть столенть лангсто салдырьксэнть. Кундасть тевентень лиятнеяк: ушов вырновтнесть мезе понгониль кедест малас: чугунт-вакант, карть-пракстат, пряхат-чакшт...
Аватне эйкакштнэнь марто седеяк лажакадсть. Кудосонть — якшамо кошт, челькень сув. Аняень седеезэяк эзь кирдеве, прок почкодсь те шкас каштмолемазо. Сонзэ човине, ванькс, теке пиже озязкень вайгелезэ пек явовсь лиятнеде — цирнезь цирнесь. Совась сон Кшни Мокшнань пплеваряскак. Тона седеяк кирвазсь. Юх эскельдясь тейтерненть пелев ды автордыксэлизе кедьстэнзэ книганть. Аняй эйкакшонь вийнесэнзэ лепштизе сонзэ мештезэнзэ ды сялгинзе пеензэ нельгицянть кедьс. Тона, теке псиде, ноцковтызе кедензэ.
Сэредькстэнть прок ормазкадсь. Книгась прась кияксос. Понгсь Мокшнань кочкаря алов.
— А-а, тон истя! — амзордызе тейтерненть нурька эземненть марто вейсэ ды вырновтызе поркснезь вальмаванть.
Весе абунгадсть.
Мезе теде мейле лиссь кудосонть, кода, козонь прась, Аняень мельсэ эзь кирдеве. Ванстовсь ансяк якшамо коштонь марямось ды мезес-бути пштис варсодевемась. Седе тов — а гайтть, а тюст, ве дюм чопода.
[149] Аняй сась ёжос аванзо элесэ. А куш а каш. Мезе-бути ёвтаволь — а ёвтави. Аванзо сельведтнеде начксь чамазо, покордамонь, оймеёжонь сэредькстэнть шкань-шкань сорнозевкшнесть турванзо. Пштикстнэде стакаль лексемс, стакаль аштемс озадо. «Юты, Аняй, юты... — зярыя шкадо мейле васолдо-васолдо пачкодсть чачтыензэ оймавтыця чевте валтнэ. — Юты, эйдинем». Сон вадяшась пакшиненть ашола черензэ ды тошксезь ладсо, апак капша кортась тензэ.
Рунго сэредьксэсь ютась. Оймеёжонсесь ды томбавомадонть ормась кадовсть калмос совамо чинтень.
...Ютасть ламо-ламо иеть. Икелень озадо ашти вишкине, аламнеде мендявозь аваломань. Кортакшов. Вайгелезэ моли цёрань вайгель ёнов. Ёвтни тень эсь эрямо кидензэ, седе ламо сеть шкатнеде, конат ютавтозельть чачома веледензэ васоло. Мари беряньстэ. Секскак кортамонь лувозо сееремань. Секе тев путни «а?». Ёвтни пеедькшнезь ды паро мельсэ. А меряткак, тензэ сизьгеменде ламо.
Апак учо саизе керш кедем ды мерсь ютавтомс коморсон кутьмерьганзо.
— Чарькодить? — потмурасто ды аламнеде виздезь мерсь тень.
— А мезть кевкстнемскак, — пшкадинь каршонзо та-кода валтнэнь нильнезь.
Комором ало марявсь эйкакшонь прядо покш будолма. Седе тов кевкстнеме эзинь карма. Визделгадынь, прок теинь кодамояк чумо. Чарькодия, мезе лиссь те ломаненть марто эрямос совамо шкастонзо, сеть иетнестэ, зярдо моданть велькссэ рангсть-вешксть идемевсень кедьстэ нолдазь даволтнэ.
— Вана мезекс теевинь вальмава ёртомадонть мейле, — мерсь авинесь ды чатьмонезевсь. Аламос аштезь поладызе ёвтнеманзо: — Тетям ульнесь превей, тевень вечкиця, эрьва мезень тееме маштыль. Сон эзь ёма васоло таркатнесэяк. Тосояк свал ульнесь весеменень эрявиксэкс. Стявтынзе пильге лангс лелян-ялаксонгак. Лиссть, кода кортыть, ломанькс. Сынь монь ламоксть усксимизь моря чирев, ормадонть менстиксэлимизь. Бажасть кастомс шумбра ломанькс. Ансяк мезеяк тень эйстэ эзь лисе. Тонсь неят-чарькодят... Ламо ковонь перть курортсо эрямось кодамояк лезэ тень эзь максо. Кадовинь, кодамокс улян, кодамокс теимизь...
Мон чатьмонинь. Превсэнь тапасть сеть раужо иетнеде, се шкань апаро тевтнеде мельтне. Мекс модамасторонть лангсо зняро кеж? Мекс сонзэ ёнкстнэсэ-чирет-[150]иесэ аламо превть ды мелень ваномат? Бажавольгак эрьвась парос, изнявольть идемевсень вийтне, ды эрямось улевель седе ванькс-валдо.
— Ёвтык, кирдевсь мельсэть се седеень тардевтиця весь, се ломанесь, кона теинзеть пайстомокс?
— Эно кода, — валтнэнь ёвтамсто ёвтницянть сельмечирькензэ, прок кавто сёлминеть, кивчкадсть-кепететсть верев. — Мельсэнь педе-пес. Иень уш кавксольть!
— Кие ульнесь се пачань оймесь?
— А?! Чарькодинь. Мерильть тензэ Кшни Мокшна. Сон эсенек велень. Авань валонзо коряс, седейтеме ломанель, — кедьсэнзэ тей-тов аволязь, ёвтнесь сырькаесь.
— Кежть кирдят? — яла кевкстнян.
— Кирдть-иля, мезень лезэсь? Мезеяк эйстэст а полавтови. Сонсензэяк азарсь тевензэ кис Пазось сюдокшнызе. Пансемадонок мейле аравтокшнызь колхозонь прявтокс. Мезе лиссь, монень уш мейле ёвтнизь, зярдо ламо иень ютазь велявтынек эсенек велев.
Сась весть пивсэма таркас. Иредьстэль. Капшазь кармась машинантень пултонь макснеме. Псп, прязо баягакс гайги. Эзизе редяяк, кода пултонть марто нерьгстызе барабанонть алов кедензэ. Кавонест керявсть. Седе мейле седеяк верендясь симеме. Зяро-бути шкань ютазь кадовсь оймевтемекс. Калмакшнызь, кода весе коммунистнэнь, паро калмамосо. Натой музыка ды флаг марто. Кие сестэ минек велесэ тейнесь истят тевть?!
...Кизэнь маней, налксиця чи. Веледенть вайгельпешкань ютко калмазыресь неяви вирьпулынекс. Сэрей, рацяня сыре кальтне копачизь сонзэ карьксэкс нуриця тарадсост. Тесэ летьке ды сундерьксэнь чопода. Ансяк седе малас пачкодезь чарькодеви: тесэ сыргоземань а содамо тарка. Велесь кулыця. Секскак удыцятнень масторост мельга кияк а ванны. Пирявксось таркань-таркань чиремсь модас. Ледстнема чувтотне, «крёстнэ», теке вейке пилысэ неняйть, эль тарныть. Тикшесэ копачазь яннэванть ве калмонть ваксс ютась псинзэ лангс анак вано лембестэ оршазь сыреде сыре авине. Мендявозь уцястонзо будолминесь неявсь покшокс. Сырькаесь мекс-бути вадяшизе калмонь чеканть ве сёлмонзо ды озась каршонзо пельснаксадозь эзементь пес. Кувать вансь сёрмадовксонть лангс. «Виряскина Татьяна Фёдоровна (1888—1966)» — тешкстазель кшнинь лапужа нилькссэнть. «Нолдык чумом, авай, — ансяк эстензэ марямга мерсь сыцясь. — Учок, моненьгак аволь ламо [151] кадовсь, курок сан ды сайсамак элезэть, кода умонь се чопода вестэнть. Паряк, куш тонь вакссо копордан чанстень кечестэнть».
Стясь, чекась-покась, меельцеде варштась тикшесэ вельтязь марнэнть лангс ды сыргась келязь секе таркаванть. Вейке калмонть вакска ютамсто нучкась, цюх аксордась ды вановтонь апак кирде седе эрязасто тусь лисема тарканть ёнов.