Усгуры хъынцъым (Хетæгкаты)

by Хетæгкаты Къоста

Усгуры хъынцъым  (1909)  by Хетæгкаты Къоста

Фыст датæ: 1899, Рауагъ аз: 1909. Равзæрæн: Хетæгкаты Къоста. Ирон фæндыр : зæрдæйы сагъæстæ, зарджытæ, кадджытæ æмæ æмбисæндтæ. – Дзæуджыхъæу : Ир, 2012.

УСГУРЫ ХЪЫНЦЪЫМ

     Мæ сæфт хуры хай,
     Дæргъæрфыг чызгай,
Куы нæ дæ федтаин, бæргæ!
     Дæ фидауц хъазтмæ,
     Дæ симгæ кафтмæ
Кæм лæууы иунæджы зæрдæ!

     Дæ мидбылты худт,
     Дæргъæрфыг рæсугъд, –
Фæскъæвда хур бон у лæгæн.
     Дæ рухс цæстæнгас,
     Дæ рæвдыд ныхас
Мæгуырæн бирæ сты мæтæн.

     Куыд царæфтыд дæн –
     Цæмæн амбæлддæн
Дæуыл, мæ иунæг сæры бон!
     Цы ма кæндзынæн,
     Куыд ма цæрдзынæн
Æнæ дæу, амæддаг дын уон!..

---