Ур кыйигӧн
Арся лунӧ вӧр керкаын водз
Ме узянінысь садьми.
Зумыд кок йылӧ ме сувті —
Веськалӧма мудз.
Тшак би перйи. Сартас ӧзті.
Горйӧ сюйи би.
Рытъя шыдтор пӧртйын шонті,
Сёйи дозмӧр шыд.
Блинтор рач пыдӧсын дзожги
(Эз тай тырмы дыр).
Сэсся ырӧш бӧрын бруньги,
Затрек лои бур.
Оз позь сёйтӧг кыйсьысь мортлы
вӧрӧ-туйӧ петны.
Лоӧ ыджыд кытшов вӧчны
ӧт пемыдсянь мӧдӧдз.
Кыз ной чӧрӧс кокӧ сюйи,
Кӧмалі ме кыс.
Пельпом вылӧ — еджыд дукӧс,
Дзумги юрӧ лаз.
Пищаль томан вылӧ видзлі,
Лыйсян кӧлуй — дась,
Сэсся матка дозйӧс видлі
(Кампас — медбур пас!).
Кокни койбедь киӧ босьті,
Коскам сюйи чер…
Ставыс лои. Керка восьті…
Пу дзир ӧдзӧс — «дзурк».
* * *
Войся пемыд вешйӧ водзӧ,
Лӧзӧдӧ сьӧд вӧр;
Вӧр-пу тӧдчӧ, — лыйны позьӧ.
Кыа югӧр гӧрд.
* * *
«Мунам, Войтӧв, — понлы шуи, —
Петам вӧрӧ, кыч!..»
Вирскӧб вартіс тшамъя улысь,
Этшсӧ оз тӧд, кыдз
Ассьыс нимкодь меным шуны,
Чеччӧ морӧсӧдз.
«Энлы тэрмась, — шуа сылы, —
Мунам кыям ур,
Лыям дозмӧр пажын вылӧ.
Ӧдйӧджык мун пур!»
* * *
Керка дорсянь лэч туй кузя
Мӧдам гажа понкӧд.
Кокъяс улын ратшкӧ резюв,
Вольдъя вывті кыпыд.
Регыд син вылысь и воши
Пуяс пӧвстӧ понйӧй —
Иса туйыд сылы сюри
(Виччысь ӧні, урӧй!).
Здук-мӧд коли. Кутіс кывны
Вӧр пасьтаыс увтӧм.
Ӧдйӧ чепӧсйи ме мунны
Веськыд туйӧд, вомӧн.
Вои. Чатӧртчӧма коз пу вылӧ:
Зэв сьӧлӧмсьыс увтӧ.
Урыс некӧн оз и тыдав.
«Он-ӧ увт тэ ройӧ?»
«Часлы», — шуа понлы, —
Эм абу тан, тӧдам».
Сэсся чер тышкӧн ме клёнги
Судзмӧн выйӧ пуад.
Тышкӧм шыыд урлы ёнтіс —
Пучӧр бердысь петіс,
Шур-шар кайис туган йылас,
Ӧдва судзӧ синмыд.
Ворсӧ-эльтчӧ, бӧжнас легӧ —
Увтчӧмлы оз эскы.
Войтӧв сэні: «ув!» да «ув!..»
Ме тай урӧс лыйи — «шку-ув!..»
Пон шы лӧнис. Урыд эз ло…
Лысъяс пӧвстті лэччис.
(Пожӧм-козйӧ оз нин кайлы,
Пуысь пуӧ чеччы).
Кӧть и жаль тэ, мича урӧй,
Лоӧ меным лыйны;
Кыйтӧг менам оз пӧт кынӧм,
Кыйӧм вылын олӧм.
Сэсся лаз нопйӧ ме урӧс
Тубыртӧмӧн сюйи.
Асьным понкӧд водзӧ мӧдім
Мӧдлысь корсьны туйсӧ.
* * *
Сідзи лунтыр понкӧд ветлам,
Чӧс туй гӧгӧр кыйсям.
Коркӧ рытладорыс локтам
Вӧлись керка дорлань.
Рытын, шоныд гор би дорын,
Урлысь кучик пӧрччан.
Кыкӧн понкӧд, муса другкӧд,
Сёрнитан да ноксян.
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1939 году и был посмертно реабилитирован в 1956 году, соответственно эта работа выйдет в России в общественное достояние в 2027 году.
The author died in 1939, so this work is also in the public domain in countries and areas (outside Russia) where the copyright term is the author's life plus 80 years or less. |