Эй тон, уйшор тӧл,
Малы тон ми доры
Милесьтым юатэк лыктӥськод?
Милесьтым кизем ю-няньмес
Лыктыса кынтӥськод;
Милесьтым дырекъясь сюлэммес
Кышкатӥськод?
Милям куанер бусыосмылы
Тон уд сёткы эрик будыны,
Милям кышкась сюлэмъёсмылы
Тон уд сёткы эрик сяськаяськыны.
Одӥг пол ке но тон, милемыз вунэтыса,
Кынтытэк, кышкаттэк возьысал ке,
Толалтэ интые, милемыз буйгатса,
Весь гужем шундыяськыса улысал ке —
Кыӵе милям бусыосмы
Чебересь, шулдыресь луысалзы,
Милям малпаськемъёсмы
Турагай кадь чагыр дуннее лобӟыса тубсалзы.
Одӥг пол ке но кыль, лыктытэк ми доры,
Бадӟым тэльёс, ӝужытэсь гурезьёс сьӧры.
Малы тон милемлы ёрмиськод?
Малы милемыз кынтӥськод?