Удмурт нылъёслы (Ашальчи Оки)

From Wikisource
Jump to navigation Jump to search
Удмурт нылъёслы
Автор: Ашальчи Оки
Поттэмын: Гудыри : газет. — 1921. — № 48. — 4-тӥ бам.

Ӧжыт гожтэт тодысалмы ке,
ӧм люкасалмы сьӧлыкез…

Гажано эшъёсы! Та кылъёсме тӥледлы верасько, тӥледыз яратыса, тӥледыз жаляса.

Пичи дырысьтымы люгыт нуналэз адӟытэк кадь быдэсмим асьмес та дырозь. Пичи дыръямы кӧкыын кылзыкумы ик, вуж правительство асьмемыз каргаз, люгыт сюресэ потыны эрик ӧз сёт. Соин асьме пӧлысь туж шудоез гинэ пичи дыръяз дышетскыны ветлыса визьмо кылъёс кылӥз, дунне бергамез валаз.

Вордэм анайёсмы но, дышетӥськонлэсь пайдазэ валатэк, пичи дыръямы сюресмес ӵоктазы. Кудмы школае мынӥськом ке но, куинь-ньыль арня ветлыса дугдӥськом вал: кинлэн потоз нуналысь нуналэ, ӟуч кылын дышетэмез валатэк, онраса пукемез? Кин чидалоз, ӟуч школаын, ӟучъёслэн «отӥ» каремзылы, тон «шыр» шуэмзылы?

Озьы тӥни дышетӥськеммы потыса но, пеньмыт кылим асьмес, яратон эшъёсы. Сукыр асьмес синмы ке но адӟе, номыр ум валаське — визьмы ке но вань. Ӧжыт бергес ке вордӥськысалмы, шудогес луысалмы дыр: табере дышетӥськыны котькинлы эрик. Дышетӥськон коркаослэн ӧсъёссы табере котькинлы усьтӥськем порлы но, удмуртлы но, бигерлы но. Табере дышетӥсьёс гуртъёсын ӝытэн-ӵукен дышето векчи нылпиосыз но, бадӟымъёссэ но.

Озьы бере гажано эшъёсы, марлы асьмес школае одӥг пол но пыдмес понытэк дорын улӥськомы? Люгыт сюрес усьтэмын. Марлы со сюрестӥ ум мынӥське? Мар возьмаськом на? Оло дышетӥськыны бер ини шуиськом? Визьмо валась муртъёс, дышетӥсьын ноку но бер уз лу шуиллям. Оло черсытэк, ужатэк кылем кожаськом-а? Бадӟым нылъёсыз дышето ӝыт. Нуназе ужаломы, ӝыт дышетӥськомы. Асьме пӧлысь кудӥз дышетӥсько ини. Номыр валамтэ пиосмуртъёс соосыз серекъян каро, соос вылэ ялан пож ву кисьтало. Ветлӥды ке но, ӧд ке но уд валалэ, вань валамдэс бызиды ке вунэтоды шуыса, соосыз отын но татын куйдыро. Пиосмуртъёслэн серекъямзылы нылъёслэн йырзы кур. Соос дышетӥськемысь берен дугдо: ӝуаны куськем кӧйтыл кайта кысэ. Кудӥз нылъёс дышетӥськемысь курдаса но дугдо: номыр валамтэ муртъёс соослы: дышетӥськиды ке, армиос олокытчы нуозы шуыса верало. Нылъёс уноез оско.

Со кылъёслы оскыны уг яра. Со кылъёс огез но чын ӧвӧл. Дышетӥськыны куськыса дугдыны кулэ ӧвӧл. Пеньмыт адямиос серекъялозы но дугдозы. Соослэн серекъяменызы асьмелэн номырмы уз кулэсмы. Дышетӥськыны ветлыса, ӧжыт ке но визь люкалом, ӧжыт ке но синмы усьтӥськоз. Дышетӥськытэк, гожтэт тодытэк табере улыны шуг, берло уката но шуг луоз.

Чылкак но номыр ум валаське уго али асьмес. Учком али огмы шоры огмы, учком пиосмуртъёс шоры. Соослэн сярысь тодэммы асьмелэн туж ӧжыт. Соослэн азьло но сюрессы асьмелэн кадь ӵоктамын ӧй вал. Соин соос тросэз гожтэт но тодо. Нылъёсыз, номыр валамтэысьтызы, соос пыдулто, пичи муртэ кадьгем адӟе. Асьмес но пиосмуртъёс мында валасалмы ке, соос асьмемыз «отӥ» ӧй карысалзы. Соос асьмемын кенешысалзы — «йырсиды кузь но, визьды вакчи» ӧз шуысалзы. Кытӥмы бен асьмелэн пиосмуртъёслэсь кур? Ужаммы уг быга-а? Визьмы, соос шуэм сяин, вакчигем-а? — Визьмы вакчи ӧвӧл. Только дышетӥськыса со визез волятыны кулэ. Соин, бер ке но, ваньмы дышетӥськом, сюзьытӥськом (уйиськом) пиосмуртъёс сьӧры. Анайёсмы-атайёсмы, черсын кулэ шуыса, дышетӥськыны ӧз ке лэзе, соослы тазьы шуом: ми дышетӥськытэк но улыны быгатӥм шуыса, милям сюрес выламы эн султэлэ, асьтэ аршинэн милемыз эн мерталэ: тӥ пинал дыръя вапум таӵе ӧй вал, дышетӥськытэк но улыны луэ вал. Табере вапум воштӥськиз, пеньмыт калыклы ин усьтӥськиз. Ваньмы потом люгыт сюресэ, ваньмы адӟом ӟеч улонэз, ваньмы дышетском.