Паймоно кадь, весь жадьытэк,
Вал сямен ужамед понна,
Аид интые куддыр бусыын
Гыремед, усъямед понна,
Капчи мылкыдэд, кужмо мугоред,
Турагай кадь чебер кырӟамед понна,
Бубыли сямен, сяська кадь вошкыса,
Чигвесьтэ жонгетыса эктэмед понна,
Тыпы кадь юн, тыл кадь пӧсь сюлэмыд понна —
Мон тонэ укыр яратӥсько!
Мурт калыклы но ушъяса верасько,
Кема тонэ уг ке адӟиськы — мӧзмисько.
Нош вина пӧзьтэмед, юэмед понна,
Вазь, астэ жалятэк, кинэн сюрем
Соин юмшамед понна,
Юмшаса уйбыт урам кузя
Костаськыса ветлэмед понна,
Висён шедьтыса — муртэ висёнэн
Саптамед понна —
Мон тонэ укыр уг яратӥськы!
Нуналлы быдэ каргасько,
Адӟонтэм карисько!..