Чырккемесь-а, эшъёс!
Нырысь тодматскоме асьмеос.
Мон луисько пересь Шамардан,
Удмурт областьлэн эрикеныз тӥлед сётэм пирдан.
Шуш-а, чебер-а,
Гажано-а, гажантэм-а —
Эн тэргаське эшъёсы,
Эн возьдаське мынэсьтым, мусоосы!
Удмурт областьмылы 10 ар тырмиз.
Со куспын ужмы туж азьпала мынӥз.
Та сярысь тӥледлы ӧжыт верало,
Быгатэмея кылбурало.
Потэ ке кылзӥськемды,
Паськытгес мед луоз пельды!
Туж курадӟыса асьмеос улӥмы,
Эксэй зӥбетэз выламы нуллӥмы.
Пеймытын асьмедыз возизы,
Секыт улонэз пересьёсмы адӟизы.
Эксэй, поп, кулак но буржуй —
Со сяна кыӵе кулэ на тӥлед тусбуй? —
Лэзизы выжызэс пыдло,
Шуизы калыкез, «быдло».
Со борды ик сектантъёс но абызъёс,
Пӧртэм висёнъёс но вуж сямъёс,
Ватосазы синъёсмес,
Сюпсизы виръёсмес.
Сыӵе вал улэмез ужасьлэн но крестьянлэн,
Солэсь но урод векчи выжы калыклэн.
Узатыса возизы пӧртэм выжы калыкез.
Пуныез сямен пурытӥзы юлтош юлтошез
Уд быдты вераса вашкала улэмлэсь уродзэ,
Удмурт калыклэсь но курадӟемзэ.
То адями вӧсясен сое интэмало,
То синтэм шырен нимало…
Чиданлы вуиз пум.
Улӟиз революци сэрегпум.
Солэн тылэз паськыт вӧлскыса,
Куштӥз эксэез сэрпалтыса.
Одӥгез зӥбетмы пазьгиськиз,
Попен буржуй власть борды каръяськиз.
Уг кушто ожмаськон кивалтоссэс,
Курадӟыто фронтын салдатъёсмес.
Керенский, Родзянко но Гучков,
Терещенко, Савченко но Милюков,
Кылъёсынызы чеберъясько,
Учредилка усьтыны дасясько.
Уг уло изьыса большевикъёс.
Власть бордын, ке, асьмелэн помещикъёс.
Уз сётэ соос ужасьлы заводэз,
Крестьянлы музъемез.
Вуж сямен ик вирез сюпсёзы,
Чырты выламы ворттылозы.
Озьы ужасез но крестьянэз валэкто,
Фронтысь салдатлэсь синзэ усьто.
Агитацимы пуктэмын усто.
Эрик басьтонлэсь дырзэ шӧдыса,
Ильичмы Петроградэ вуиз дыртыса.
Ӧрчи сямен заводъёстӥ поръя,
Пролетар калыкез бордаз, чоръя.
Пулемётъёс, броневикъёс батыр кие шедё.
Министръёс мукет кунэ пегӟо.
Озьы Октябрь Революци кылдыса.
Буржуй власть быриз пезьдыса.
Ужась но крестьян кунлы власть луизы,
Куспазы Совет бырйизы.
Солэн уженыз кивалтыны,
Совнарком кулэ луиз кылдытыны.
Татын нош Ленинмы тӧрояське,
Андан кужымез бордаз люкаське…
Жаляло тушмонъёсмы,
Помещикен буржуйёсмы,
Асьсэлэсь улэмзэ но ваньбурзэс,
Ужась но крестьян вылын ворттылэмзэс,
Уг ярато большевикъёсты,
Советэ быръем депутатъёсты.
— Тӥ, пе, зырымесь,
— Басьтыны музъеммес.
— Ум, пе, сётэ заводъёсты,
— Куашкатомы фабрикъёсты.
— Дышетскымтэ, пе, тӥ государствоен кивалтыны,
— Милемыз, пе, кулэ вал отсы пуктыны
Бордазы офицеръёсты, контрреволюционеръёсты люказы,
Гражданской фронтлэсь тылзэ ӝуатӥзы.
Удмурт областямы но вуылӥз Колчак.
Маза ӧз сёты солы «большак»[1]:
Сьӧсь мылкыдзэ кортназ,
Власть борды мынон сюрессэ пытсаз.
Ужазы бен соос адями кадь-а?
Юрттыны ӧтиллям на бордазы блокада,
Пыш но уг йӧтылы берпалазы,
Озьы куашказ блокадазы!
Туж кема ожмаськимы,
Власть понна нюръяськимы.
Калыклэн батыр кужымез,
Ӧз сёты тушмонъёслы кунмес
Куашкатэм хозяйствомес кышъяны кутскимы.
Соку нош сютэм арен пумиськимы,
Со борды ик вераса,
Тиф куштэ калыкез кораса…
Эк, туж секыт, туж секыт вал со аръёс,
Тӥ медам адӟе сое, пиналъёс!
Озьы ке но, жугиське на гадямы сюлэммы,
Оскытэ асьмедыз азьпала улонлы.
Кужыммы асьмелэн вань!
Кышкатэк — азьлань!
Табере эшъёсы,
Гажано удмуртъёсы,
Кылбурмес ӧжыт воштомы,
Автономи сярысь гожтомы (вераськомы)
Пролетар калык огазеяськыса,
Буржуйёсын ожмаськыса,
Кенешо властьмы асьмелэн кылдӥз,
Трос уж но солэн азяз султӥз.
Огласянь, кунмес буржуй пыремлэсь возьмано,
Пушласянь но сое тушмонъёслэсь сузяно.
Мукетласянь — властьмес юнматыны кутсконо,
Вуж эксэй кыткетъёсты юсконо.
Бадӟым Россей улосмы,
Трос пӧртэм отын калыкмы.
Ӟуч, удмурт, пор но бисерман,
Собере бигер, чуваш но армян, —
Уд быдты ваньзэ вераса,
Жадёд соосты лыдъяса.
Пӧртэм калыклэн пӧртэм сям,
Культураен но соос вайяськиллям:
Кудӥз пеймытэ кылемын,
Кудӥз кыр муртлы пӧрмемын,
Кудӥз улэм бытчияськыса,
Лябъёссэ но востэмъёссэ пачкатыса…
Власть бордын ужась Большевикъёсмы,
Ленин но мукет комиссаръёсмы,
Эксэйлэсь тазэ но бугорзэ сэртто-пертчо,
Собере «Декларация прав трудящихся» потто.
— Коть кыӵе выжы калыклы,
— Курадӟыса азьвыл улэм калтаклы,
— Паськыт эрик, пе, сётӥське,
— Самоопределяться кариське! —
Озьы автономиос кылдыны кутско,
Кенешо Союз борды соос герӟасько.
Удмуртъёслэн но азьветлӥсьёссы,
Наговицын но Борисов кадьёссы,
Уг уло изьыса,
Автономиез вунэтыса.
Удмуртъёсты люкало кенешыны,
Муское ветло тэльмырыны[2]
Кулэ бумагаосты быдэстыса,
Совнаркомын пуко кенешыса.
Сюрс укмыс сю кызетӥ арын,
Муско карын,
Куатетӥ ноябре,
Совнаркомын кенешем бере,
Удмурт автономия сярысь,
Декрет потэ Муско карысь,
Шудо-буро киосынызы,
Зарни пероосынызы,
Калинин, Ленин но Енукидзе,
Юнмато декретлэсь ужзэ,
Озьы Удмурт автономия кылдэ!
Паськыт эрик мылкыдэз ӝутэ,
Андан кужымез уж борды кутэ.
Вуж улонэз каргаса,
Выльзэ быдэстӥськомы дурыса.
Автономимы уката кужымез будэтэ.
Кенешо власть кышноосты ӧте советэ.
«Управлять ке каро вал азьвыл буржуйёс,
Табере мед быгатозы кухаркаос!»
Озьы Ленинмы сӥзьыса кельтӥз, —
«Дышетске, дышетске» со шуылӥз.
Азьпала мыныны но сюрес возьматӥз
Нимаськомы сое «Ленинизм».
Со сюрес кузя асьмедыз ВКП валтэ,
Сюрес тӥясьёсты куажырак сэрпалтэ.
Нош сюрыло ке пичи янгышъёсмы,
Ӵок шуомы, эшъёсы!
Асьмеос ведь дышетскымтэ,
Государство ужен азьвыл кивалтымтэ.
Ужаса — дышетскомы,
Дышетскыса — ужаломы!
Янгышъёсмылэсь возьдаськытэк,
Соосты тупатъяломы дугдылытэк.
Медам шеде куашкам мылкыдъёс пӧламы,
Медам каръяське тушмонъёс бӧлякамы!
Му пыр соосты виятомы,
Пузкаръёссэс куашкатомы!
Султӥз иземысь Батыр,
Кужымзэ вӧлскытэ со дунне тыр!
Пеймыт улоскы шунды ӝужа,
10 ар ӵоже Автономимы ужа.
Удмуртэз со югдытэ,
Эшъёссэ уйыны дыртытэ.
10 ар ӵоже трос ужъёсмы быдэсмизы,
Дышетскымтэосмы но кулэсмизы.
Удмурт калыклы удмурт кыл сётэмын,
Книга но газет удмурт кылын гожтэмын.
Лыдӟе эшъёс, дышетскелэ,
Дышетскыса улэменыды юнматскелэ!
Техникумъёсы но вузъёсы мыныса,
Бертэ отысь тодонлыкен узырмыса.
Собере хозяйствомес ӝутыны юрттоды,
Улэммес социализме валтоды!
Уг вунэты асьмедыс Кенешо власть,
Бере кылеммес тодэ ини со кемалась.
Уг жаля коньдонзэ югдытонлы,
Калыкез тазамытонлы.
Сельской хозяйстволы но юрттэ,
Тракторъёсты, машинаосты гуртэ пыртэ.
Сётэ сортовой кидыс,
Араны косэ чебер удыс.
Быдэс гурт тусмы воштӥське,
Калыкмы колхозэ огазеяське.
Аналтӥськомы ини 3 бусы ужез,
Кизиськомы клевер турынэз.
Улэмез но ужез выль сямен пуктыны,
Ум вунэтӥське калыкмес валэктыны.
Каръёсмылэн но тусъёссы выльдӥсько,
Гурезь быдчаесь выль юртъёс лэсьтӥсько.
Отсы ужасьёсты каръяськомы,
Соосты гулбечъёсысь поттӥськомы.
Бетон, корт но из, —
Сыӵе выль карлэн тусэз луиз.
Вуж заводъёсмы выльдӥсько,
Выльёсыз но интыясько.
Етӥн-пыш но нюлэс заводъёс,
Басма куон но мар фабрикъёс,
Выль шоссеос но чугун сюресъёс, —
Индустриализацилэсь туссэ возьмато,
Калыкмес социализме валто.
Озьы реконструкци бордын ужаськомы,
5 арлы пусъем планэз 4 арскын быдэстӥськомы.
Трос ужъёсмы 10 арскын быдэсмизы,
Тросэз «висёнъёсмы» кулэсмизы.
Солэсь но трос ужъёсмы азьпалан,
Быдэстоно луоз соосты ялам.
Трос кулэ асьмелы ужасьёс,
Усточи мастеръёс но специалистъёс.
Кадр дасянэз но вунэтытэк,
Дышетомы калыкмес дугдылытэк.
Уно вераськи ини тӥленыд эшъёсы,
Акылес луизы дыр кылбуръёсы.
Соин ик кылбурме пумъясько,
Тӥлед ӟеч мылкыдме верасько.
Улэммес умой пуктыны,
Огъя ваньбурмес узырмытыны,
Азьпала но ужаломе жадьытэк,
Ум кельтэ секытъёссэ вормытэк.
Мед шӧдозы кужыммес тушмонъёсмы,
Выжытэм мед бырозы вредительёсмы!
Мумы пушказы мед сисьмозы соос,
Убир мылкыдъем шайтанъёс!
Сыӵе ведь мон лек луисько,
Кылбурелэн пумаз ке вуисько.
Туннэ уг поты лекъяськеме, —
Лыктэмын угось асьмеос шулдыръяськонэ.
Шулдыр мед ортчоз праздникмы,
Автономи именникмы!
Яратыны мед быгатоме ас эрикмес,
Возьматомы Пуанкарелы[3] мыжыкмес!
Ож кивалтосэн ке со сэзьяське,
Асьмеос ум кышкаське.
Быдэс дуннеысь пролетаръёсты,
Ужасьёсты но крестьянъёсты,
Герӟаломы бордамы,
Люкаломы революци фронтамы!
Ум вунэтэ вераны салам,
Кенешо властьмылы аслам!
Озьы ик Коммунист партиез но буре вайиськомы,
Автономи понна тау шуиськомы!
Секыт вал асьмелы эрикез басьтыны!
Басьтэмзэ быгатомы возьманы!
Кужыммы асьмелэн андан!
Удмурт Автономилы сӥ-дан!