Асьмелэн Иж кармы ялам но ялам умой, ӟечгес тупаса азьпала мынэ. Табере отын, мукет бадӟымесь каръёсын кадь ик, музеймы но вань ини. Та музеймы асьмелэн 1920-тӥ арын пӧрмиз. Озьы ке но, «Дасэтӥ октябрь» праздникмы дырозь та музеймес музей шуса ниманы уг луы вал. Коркаосыз но туж начар — урод — вал. Кылсярысь, корка укноезлэн улысь янакъёсыз ик усьыло вал. Возьматон тӥрлыкъёссэ — котыръёссэ — но трос шуымон уг луы вал. Со тӥрлыкъёсыз но сюэз пушкысь тямыстон вить ёросэз сӧриськемын вал. Обикен Обоно солэсь таӵезэ адӟыса, ӟеч тупатыса, пыдъйылаз умой пуктыны малпаськизы.
Таӵе бадӟым ужез тупатыса пумаз вуттыны Обоно, Обиклэн дэмламезъя, М. Ильинлы сётӥз. Со ужез М. Ильин отын быдэсак огназ ужаз, одӥг юрттӥсез но ӧй вал. Озьы ке но, со ужзэ со, одӥг муртлы вормыны луонтэм вал кадь ке но, «Дасэтӥ Октябрь» праздникмылы вуттӥз. Со дырысь табере асьме областьмылэн но, мукет каръёслэн кадь ик, музеймы вань ини шуса ушъяськеммы луэ. Ар ӵоже ужаса, музей коркаез но, уксё, коньдон, кужымезъя тупатэмын, тӥрлыкъёсыз но ваньмыз тодманы луонтэм выль кадь тупатыса, кулэзъя, Мускоын кадь, выль тусэн-буен интыямын. Со сяна ас музеяз туж трос выль тӥрлыкъёс люказ. Ваньзэ ик вераны ке кутскид, вераса но уд быдты шуыны луоз. Та верамелэсь чынзэ-ӧвӧлзэ тодыны турттӥсь мурт пырыса ас синмыныз мед адӟоз. Умой ке учкиз, возьматӥсьлэсь верамъёссэ ӟеч ке кылдӥськиз, со ужъёссэ адӟоз.
Соин тӥни Иж карын улӥсьёс но, гуртын улӥсьёс но коть мар сярысь тодэм-валамзэс мултэстэмзы — уногес каремзы — потэ ке, тужгес ик нош асьме областьмылэсь туссэ-буйзэ ӟечгес тодэмзы потэ ке, та музеямы пырыны мед тыршозы, возьматыса верасьлэсь тросгес мед юалозы. Тазьы учкем понна но кылдӥськем, юам-верам понна, коньдон уг басьто, коньдонтэк валэктыса верало.
Та музеймы Иж карын Ленинлэн урамаз, ульчаяз, 7-тӥ номеро юртлэн вылысь полэсаз, этажаз, луэ. Возьматонзэс нош арнялы ньыль нунал ӵоже: пуксёнэ, вторнике, вир нуналэ, средае, покчи арняе, четверге, но ӟуч арняе, воскресенняе, возьмато.