Удмуртлыг (Герд)

From Wikisource
Jump to navigation Jump to search
Удмуртлыг
Автор: Кузебай Герд
1928 ар


Удмуртлыг


Вазен,
Шуо ке вал: «Удмуртлыг»,
Пуксе вал мынам син азям
Сьӧд-сьӧд нюлэс, лыз Кам,
Зӥбем, пыдултэм калык,
Урыс, кортнэт, сермет,
Ожмем бусы, керемет.
Вазен,
Шуо ке вал: «Удмуртлыг»,
Пуксе вал мынам син азям
Висён, жоб улон сям,
Арак пӧзьтон тӥрлык,
Сьӧд уй, сисьмем ныр,
Ӵындэм корка, юон дыр
Пуксе вал мынам син азям
Вазен,
Шуо ке вал: «Удмуртлыг».
Нош табере,
Шуо ке мыным: «Удмуртлыг»,
Улэп кадь пуксе син азям
Сайкам нюлэс, лыз Кам,
Султэм, ӝутӥськем калык,
Укмыс бусы, паськыт ӧс,
Выль дуннее сюрес.
Нош табере,
Шуо ке мыным: «Удмуртлыг»,
Улэп кадь пуксе син азям
Удмурт кыл, эрказ кырӟам,
Дышетскон корка, выль лыс,
Тракторъёс, завод, коллектив
Вань удмурт гуртъёстӥ
Улэп кадь пуксе син азям
Табере,
Шуо ке мыным: «Удмуртлыг».


30.X.1928