Тӧлыся войӧ
Мед нӧ неуна кӧдзыд и неуна сёр, —
Кыла сьӧлӧмысь ыджыд лача.
Мекӧд орччӧн со мӧвп сяма ёрт,
Сӧмын ме сійӧс ӧтнассӧ аддза.
Лӧньӧм кар вывті ветлӧдлім дыр,
Тӧлысь надзӧник енэжӧд кывтіс...
Ёртлӧн варовлун помтӧм, эз быр...
Ошкис, висьтавліс ярмӧмӧн вывті.
Ошкис тӧлыся лӧнь ывлавыв,
Кутшӧм гӧгӧрыс гажа да мича.
Сэсся ланьтіс, и мен сетіс кыв;
Кисӧ кабырті да вочавидзи:
— ... Эстӧн, ылын зэв... Коми сикт эм...
Асыв-войвылын, пармаын, ёртӧй.
Сэні чужлі и быдмылі коркӧ,
Колли гажаа ассьым том нэм.
Сэні татшӧм жӧ тӧлыся рыт,
Лӧзов югыдӧн ойдӧма ылӧдз.
Сэн оз дугдывны том йӧз войбыд
Сьывны, йӧктыны дзурыд туй вылын.
Эзысь тугъяса сулалӧ коз,
Лунвыв йӧр дорын, гыӧртӧм садйын...
Тӧда, талун оз ӧти том гоз
Тӧлысь вылӧ да муслунлы радлы.
Муса ёрт, ломзьӧ дон морӧс пытш!
Видзӧд, мичлуныс, муса ёрт, татӧн,
Видзӧд, тӧлысьлӧн дзирдалан кытш
Кутшӧм кажитчӧ матын, зэв матын.
Лӧня вашъялӧ енэжлӧн пи,
Мый нӧ сылӧн кӧ югӧр оз шонты:
Найӧ кокнялӧм сьӧлӧмын — би,
Найӧ радейтчысь синъясын — шонді.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
The author died in 1943, so this work is also in the public domain in other countries and areas where the copyright term is the author's life plus 80 years or less (if applicable), or the copyright term is 82 years or less since publication (if applicable). |
|