Тылъёс (Короленко)
| Тылъёс Автор: Владимир Галактионович Короленко 1900 ар Нырысь ним: Огоньки |
Кызьы ке кемалась, пеймыт сӥзьыл ӝытэ, мон мӧзмыт сибирской шуретӥ пыжен уяно луи. Шӧдытэк шорысь шурлэн кожоназ, азьпалан, пеймыт гурезьёс улын тыл пиштӥз.
Пиштӥз яркыт, юн, туж матын…
— Я, инмарлы тау! — шуи мон, шумпотыса, — кӧлон инты матын!
Полысась берытскиз, пельпум сьӧртӥз тыл шоры учкиз но нош ик осконтэм мылкыдын полысъёсыз вылэ зӥбиськиз.
— Кыдёкын!
Мон ӧй оскы: тыл озьы ик пиштэ, валантэм пеймытысь азьпала потыса. Нош полысась шонер верам: зэмзэ ик, кыдёкын вылэм.
Со уй тылъёслэн сямзы — пеймытэз вормыса матэтскыны, ворекъяны но, сӥзьыны но аслаз матынэныз бордаз кыскыны. Тани-тани полысэн эшшо кык-куинь пол шонтӥд но, — мынонлэн пумыз луоз кадь потэ… Озьы ке но — кыдёкын…
Кема ваським на ми, чернила кадь, пеймыт шуретӥ. Ми азе ущельяос но скалаос потылӥзы, матынскылӥзы но уяса кошкылӥзы; берамы кыльыса, пумтэм кыдёке ышылӥзы кадь соос, тыл нош ялан азьпалан сылэ, ворекъяса но ас дораз кыскыса, — ялан озьы ик матын, ялан озьы ик кыдёкын…
Мынам табере ӵем тодам лыктылэ, со скалаё гурезьёсын вужерам пеймыт шур но, со улып тыл но. Уно тылъёс азьвыл но, бӧрысь но асьсэ матынэнызы бордазы монэ огнаме гинэ ӧз кыскылэ. Нош улон ялан со мӧзмыт ярдур висъёскытӥ бызе, а тылъёс кыдёкын на. Нош ик полыс вылэ зӥбиськоно луэ…
Нош котьма ке но… котьма ке но азьпалан — тылъёс!..