Ӵошкыт чебер возьвылъёс
Туннэ муртэн тырмизы,
Туж паськытэсь арамаос
Иземзылэсь султӥзы.
Толон калык возь люкиз ке,
Дасоосын сётъязы,
Туннэ нунал туж чебер ке,
Турнан валче кутскизы.
Котькытын но кусо куара
Жин-жан шуса кылӥське,
Куспаз калык гурламъёсын
Быдэс ёрос сэзъяське.
Тӥни мынэ одӥг турнась
Кужмысь суралъяськыса,
Ӵогемезлы быдэ бӧмлэсь
Уно турын ӵогыса.
Тырос мыно солэн сьӧраз
Со кадик ик тыршыса,
Пиосъёслэсь нылкышноос
Ялан ортчын турттыса,
Ӝужыт будэм турын-куарез
Нюлэм кадь ик ӵышкыса,
Ческыт зыно сяськаосыз
Выжыостӥз ӵогыса.
Асьсэлэн нош со куспын ик
Серем кылзы уг быры,
Озьы ке но вераськонлэсь
Мылзы-кыдзы уг тыры.
Со куспын ик нылпиос нош
Асьсэ коже гурлало:
Вожмаськыса ческыт боры
Чаен юны бичало.
Я ке турнам турын вылын
Бекмылляськыса шудыло,
Я ке шулан гумыосын
Туж тыршыса шулало.
Я ке бӧрдӥсь сузэр-вынзэс
Сюлмысьтызы либато,
«Нуны бӧрдэ» шуылыса,
Анайёссэс ӧтьыло…
Секыт ке но та турнан уж,
Сое шӧдӥсь чик ӧвӧл, —
Туж шулдыр шол, туж чебер шол
Турнан вакыт котькинлы.
Со понна ик турнасьёс но
Воштӥськыса лыктӥллям,
Кыдёкысен учкон дыръя
Сяськаослы ушаллям.