Тумвлӓ пӹлгомышкыла кырмат

From Wikisource
Jump to navigation Jump to search

Аликов Валерий

Тумвлӓ пӹлгомышкыла кырмат
Тумвлӓ пӹлгомышкыла кырмат
Вуешӹштӹ пӹлвлӓӓт тӹкӹлӓлтӹт машанет
Мӹнят кырмем
Кынамжы пӹлвлӓмӓт тӹкӓлмӹ шон колта
Дӓ пышкыды пӹлеш шӹнзӹн

Мӱлӓндӹн кымдыцшым анжалаш
Чонгештӹнем.

Тумершкӹ церкӹшкӹ вуйта пырет
Дӓ тум лишкӹ
Икона анзыкы вуйта толат,
Элтӓлет, юк лыкде тӹдӹ доно хытыралат.
Тӹдӹжӹ гӹнь туан ӓтялӓок
Тӹньӹм вуйта ынгыла.

Тьотям, ӓтям, ӹзӓм, шольым,
Папам, ӓвӓм ӓкӓм, шыжар –
Кырык марынвлӓ,
Ӓвӓсирӹштӹ шалгышы
Виӓн лаштра тумвлӓ,

Кыдывлӓ важвлӓштӹм келгӹшкӹ,
Анят, мӱлӓндӹн кӧргӹшкок колтенӹт.
«Важдымы тум йӹле кошка,
Важдымы эдем йӹле ямеш»-
Тьотям мӹлӓнем икӓнӓ келесен.

Мӹньӹн тумем важвлӓжӹм
Келгӹшкӹ колтен
Седӹндонат тӹдӹм тулмардежӓт,
Тел поранат сӹмӹрен ак сӹнгӹ.
Мардеж пуалмы годым
Тумвлӓ укшвлӓштӹм лыпшалыт
Ӹлыштӓшвлӓштӹ доно шужгалтат:
«Ӹш-ш-ш…! Ӹш-ш-ш!».
Нӹнӹ мӹлӓнем туан йӹлмӹнӓ
Доно вуйта попалтат,
Шужгалтат, хытыралыт.

«Тум-кырык марынвлӓм
Анжыктышы пӱшӓнгӹ»
Тьотям мӹлӓнем келесен.
Тӹдӹ шукым тырха,
Ӹлӓш цаца, соты докы
Кырма дӓ укшвлӓжӹм шӓрен,
Вес тумлан палшык дон кычыкым
Виктӓ. Ӓнят тенге нӹнӹ

«Иквӓреш лиӓш келеш!»
Манын икӹжӓк –иктӹлӓнӹштӹ
Келесӹнештӹ?
Тумерлӓлӓ каяш манын
Мӓлӓннӓӓт иквӓреш лимӹлӓ
«Иквӓреш, цымырын лиӓт гӹнь
Ӹлӓшӓт куштылгырак»-
Манын тьотям келесен.

Иквӓреш линӓ гӹнь,тӓнгӹн кидшӹмӓт пӓлет
Иквӓреш линӓ гӹнь кичкӹж-цӹркӓнен,
Нелӹвлӓмӓт сӹнгет
Иквӓреш линӓ гӹнь ойхынаат чӹдӹрӓк
Иквӓреш линӓ гӹнь сусунаат шукырак
Иквӓреш линӓ гӹнь йӹлмӹнӓӓт лывыргырак
Иквӓреш линӓ гӹнь мырывлӓнӓӓт сусураквлӓ
Иквӓреш линӓ гӹнь кӓршнӓӓт сусуракын тьонга
Иквӓреш линӓ гӹнь аярат сотыракын анжа
Иквӓреш линӓ гӹнь пӓшӓнӓӓт ашна
Иквӓреш линӓ гӹнь лыдышвлӓӓт сирӓлтӹт
Иквӓреш линӓ гӹнь нӹнӹ лыдалтыт
Иквӓреш линӓ гӹнь ӹшкенӓ гӹц анна шеклӓнӹ
Иквӓреш линӓ гӹнь марын ылмына доно когоэшненӓ
Иквӓреш линӓ гӹнь ӹшкӹмнӓм шотеш пиштенӓ
Иквӓреш линӓ гӹнь йӹрвӓш шукырак ужына
Иквӓреш линӓ гӹнь …

Ӓлдок, тенгежӹ гӹнь, иквӓреш линӓ!
Иквӓреш линӓ гӹнь ӹшкӹмнӓм шотеш пиштенӓ
Иквӓреш линӓ гӹнь йӹрвӓш шукырак ужына
Иквӓреш линӓ гӹнь …

Ӓлдок, тенгежӹ гӹнь, иквӓреш линӓ!
Тумвлӓ пӹлгомышкыла кырмат
Мӹнят тум ганьок
Кӱшкӹлӓ дӓ сотышкыла кырмаш цацем
Кӱшӹцӹн йӹрвӓш шукыракым ужат
Дӓ иктӓ пӹл вӹк шӹнзӹн
Мӱлӓндӹн кымдыцшым анжал кердӓт.