Тумаялаш

Григорьев Вячеслав

Тумаялаш
Кечӹ сусун анжа
Вады векӹ анжен.
Лишӹл детский садшы –
Йӓнглӓн вуйта мадыш…

Эргем токем миӓ –
Мӹнь веет ӓтя линӓм,
Сасла: «Папа! Папа!
Пап, пойдем домой!»

Выртеш элтӓлӓлӓм,
Кычалалын нержӹм.
Кидӹш трӱкок нӓлӓм,
Шаям ланзыледӹл:

«Мӹньӹ ылам «ӓтят» -
Марла шаям ӓштӹ!»
«Нет, - пелештӓ, -папа,
Папочка ты мой!»

Ӧлицӓштӹ мӓжӹ
Ужына кӹсиӓм.
«Ой, синичка», - манеш
Эргем кек лиш миэн.

Пӓлӹмӹ кугуза
Мӓ паштекнӓ куза –
Пӧртнӓн вӹц этаж
Дӓ ташкалтыш вашт…

«Дядя, здравствуй!» - йӹнгӹл
Ӹрзӓ мӹньӹн йӓнгӹм.
Выча тонна «мама» -
«Ӓви» агыл малын?

Вуйнаматан ылат
Кырык мары йӹлмӹ:
Тетя ак ынгылы
Тӹньым? А тыл йӹвӹж?

Изи кечӹнь кушкеш,
Ӹлӹмӓшӹш ушна:
Сакой йиш пӓшӓшкӹ,
Сакой халык док…

Ак код нима ӓшлӓн
Марла шамакемжӹ,-
Мӹндӹр корныш кешӹ
Попа рушлаок?

Пӓшӓ лошты ак кол
Шачмы вел шамакым,
Йӓнгжӹм пачын кердеш
«Папа» шамакшок?
Келеш ыльы, келеш
«Ӓти» манмыжок!