Тулыс (Кедров)

From Wikisource
Jump to navigation Jump to search
Тулыс
Автор: Филипп Григорьевич Кедров
Кылдытон дыр: 1937. Источник: Кедров, Ф. Г. Быръем произведениос — Ижевск : Удмуртской книжной издательство, 1959. — С. 126—127. — 206, [1] с.: портр. — На удмурт. яз. — 5000 экз.

Тулыс


Тулыс омыр, мамык выллем,
Вешаськыны яратэ.
Мылкыд капчи, шудэ сюлэм,
Шулдыр дырлы шумпотэ.

Шырчик сайкась кызьпу йылын
Кырӟа, бурдзэ сэзъяса,
Лыз кисьтаськись чагыр инмын
Турагай чирдэ лобаса.

Бызё шуръёс, пичи вуос
Шаугетыса кыдёке.
Кыре пото лудъёс, возъёс, —
Шунды соосты учке.

Учке шунды пальпотыса,
Пазяса чильвайёссэ,
Та музъемес шулдыртыса
Пальккытэ ас шунытсэ.

Тулыс куазьлэсь ноку уд ӵыд,
Тулыс пумтэм кырӟанъёс.
Ланге куара нунал лумбыт,
Кӧня дуно шудонъёс.

Канаватӥ бызись вуэз
Ӵыпет ӵыпыны кулэ,
Отчы пуктоно чарыкез
Дыраз лэсьтыны кулэ.

Шырчик уморто лэсьтэмын,
Уг пыр меда тулыс зор:
Ялан кулэ эскерыны, —
Кырӟасьлы медло ӟеч дор.

Школа понна потэ лэсьтэм
Горд сюйлэсь скал, вал, ыж, парсь.
Тулыс ноку но ӵыдонтэм,
Ӟеч-а, дано тулыс куазь!

Кудзэ карод одӥг кузя? —
Нокудаз но уд вуы.
Тая, Валя, Митя, Кузя, —
Туж бадӟым коллективмы.

Маке кулэ, лэсьтӥськом но
Ӵош шулдыр гур кырӟаськом.
Бызись шур но, шырчикъёс но —
Ваньзы кырӟан юрттӥсько.


1937


Public domain
This work is in the public domain in countries where the copyright term is the author's life plus 70 years or less. See Copyright.