Мамыклэсь но небыт омыр шӧм пазьгиськиз,
Омыр шӧм либатӥз та егит мылкыдэз.
Шундыед мыняса каньылля лэзиськиз,
Со перӟиз ми дорысь, улляса югытэз.
Куазь ӝомдӥз, капчи тӧл но пуксиз,
Нош ик нош музъемез югдытӥз тыр толэзь,
Тэль дурысь выль гуртэд толэзья усьтӥськиз,
Секретӥз но выре — вылтырыз нош азвесь.
Тэль пушкын уӵыос ас гурзэс нёръяло,
Писпуос кылзӥсько кисьтаськись гуръёсты,
Капчиесь пилемъёс ин вылтӥ лобало,
Туж шыпыт мадьыло ортчылэм дыръёсты…
Гурт пумын, тэль дурын, выль паркын туннэ ӝыт
Егитъёс кырӟало шулдыресь выль гуръёс,
Кытын ке вуж арын вузӥзы весь уйбыт
Секытэн пачкатэм егитъёс но мӧйыос.
Нош туннэ соослэн пуръёссы лангиське
Тэль вылысь — луд вылэ, колхозысь — колхозэ.
Та кырӟан улонэн, выль шуден нимаське.
Калыкмы яратэ аслэсьтыз страназэ.
Арганлэн куараез юрттӥське эктыны,
Тэль кылзэ — дугдытэк нёръяло уӵыос.
Куазь ӝомдӥз, капчи тӧл но пуксиз,
Нош ик нош музъемез югдытӥз тыр толэзь.
Тэль дурысь выль гуртэд толэзья усьтӥськиз,
Серектӥз но выре — вылтырыз нош азвесь…
