Тулыс кампанилы дасяськон дыръя крестьян калыклы трос пӧртэм визь-кенеш сётӥськомы. Кидысэз сортовать карыса, формалинэн гылтыса, музъемез кыедаса, умой ужаса кизёно шуиськомы. Со куспын и та кылъёсмы ӵем дыръя кӧс кылын гинэ ортчо. Малы озьы но тазьы каронзэ тып-тып, йылысь-пумысь мур, пыдло пырыса валэктыны дыр ичи шедьтӥськомы. Соин ик крестьян калык кылъёсмес ичи уже пыртэ. Малыез но тодмо. Кӧс кылын валэктэммес со валаса уг быдты но ужзэ вуж дышем сяменыз ортчытэ.
Таӵе ужлэсь мозмон понна, агроуполномоченнойёслы но гурт активлы курсы ортчытыны малпамын. Тӥни со курсъёсы кажной колхозысь, кажной гуртысь агроуполномоченныйёсты люкаса, соосты тулыс кизён кампани сярысь котырак умой дышетоно. Собере соос ас тодэмзэс бускельёссылы валэктыны мед быгатозы.
Со сяна колхозъёсын но гуртъёсын нимаз кружок кылдытыса, со кружокъёсын сельской хозяйстволэсь пӧртэм ужъёссэ дышетоно. Егит воргоронъёсты но пиосмуртъёсты бусы уж, вал вордон сярысь дышетыса, нылкышно калыкез пудо, чипы-курег вордонлы, бакча утялтон ужлы дышетоно.
Со понна колхозъёслы, гуртъёслы кулэ книгаос басьтоно. Сыӵе книгаосмы удмурт кылын но ӟуч кылын но трос пӧртэмес вань ини. Дунъёссы но дуно ӧвӧл.
Кружок кылдытон но книгаосты вӧлмытон борды нырысь ик комсомолецъёслы золгес кутсконо. Соослэн ужзылы гуртысь дышетӥсьёс но юрттозы. Озьы ик каръёсын дышетӥсьёс но та ужез медам вунэтэ, гуртъёсы потакузы крестьянлы кулэ литератураез мед вузалозы, кружокъёсты кылдытыны мед юрттозы.
Культураен но техникаен азьпалскем государствоос котькудӥз наука пыртӥ ужез соя пуктыса гинэ соос ас улэмзэс ӝутыны быгатэмын. Озьы бере асьмелы но наукаез уж борды кыткыны дыр вуэмын ини. Кенешо властьмы но та ужлы юрттэ, гуртъёсы но колхозъёсы красной уголокъёс, лыдӟон коркаос усьтэ, соослы пӧртэм книгаос, журнал-газетъёс сётэ. Кылемез ужмы асьме бордын. Ваньмы огкылысь кариськыса, ваньмон дырмес дышетсконлы сётоме. Дышетскыса гинэ котькыӵе ужмес шонер пуктыны быгатомы, ужмы бордысь пайдазэ тросгес поттомы.