Туй кузя ме муна
| Туй кузя ме муна (1926) by |
| Гижан кад: 1926, Йӧзӧдан во: 1926. Ӧшмӧс: Коми гижысьяс. Мӧскуа, 1926. Лб. 90-91. |
Туй кузя ме муна
Кӧлӧкӧла вӧлӧн.
Кӧлӧкӧлыс сьылӧ,
Оз и тупкыв вом.
Вӧрыс вывті уна
Югыд Эжва пӧлӧн,
Видзӧдан кӧ ылӧ —
Абу сылы пом!
Кыпӧдчӧны сэні
Коз да шыльыд пожӧм.
Быдмӧ накӧд сора
Небыд ема ньыв.
Пемыд вӧрсӧ ӧні
Ловзьӧдӧма гожӧм.
Кылӧ сэні нора
Тӧвлӧн сьыланкыв...
Керӧс вылысь лэчча,
Эжва дорӧд муна.
Вӧрыс шочмӧ, югдӧ,
Воссьӧ паськыд видз.
Чукӧртчӧма сэтчӧ
Коми войтыр уна.
Быдӧн турун пуктӧ
Гажапырысь сідз.
Коса ытшкӧ-ворсӧ,
Куран зіля куртӧ.
Шойччӧг оз и тӧдлы
Ытшкысь-куртысь йӧз.
Кодкӧ, кылӧ, горзӧ:
«Ваяв татчӧ юртӧ!
Тэрыбджыка ветлы!
Дзик жӧ нин тэ мӧс!»
Мунан туйыс кежӧ
Бара пемыд вӧрӧ.
Зумыштчӧма, шувгӧ,
Оз и ланьтлы вӧр.
Вынсӧ сійӧ чӧжӧ,
Быдман уджсӧ керӧ,
Скӧрмылас кӧ, увгӧ,
Ку пытшкас оз тӧр.
Сувтӧдлӧма сэні
Пӧтка кыян лэчьяс.
Тар кӧ сэтчӧ шедлӧ,
Кыйсьысьлӧн оз вош.
Аттӧ, со тай кӧні
Чеччалӧны кӧчьяс!
Гашкӧ, матын ветлӧ,
Тапикасьӧ ош...
Водзӧ муна-муна
Кӧлӧкӧла вӧлӧн.
Пыр на локтӧ паныд,
Оз и бырлы вӧр.
Вӧрыс вывті уна
Югыд Эжва пӧлӧн.
Дыр на сійӧ тані
Чер улын оз пӧр.
Пуяс костын ыркыд,
Оз нин киссьы пӧсьыд,
Уналаын гора
Жургӧ парма ёль.
Нитш вывті оз пыркӧд,
Сьӧлӧмыдлы лӧсьыд,
Кӧлӧкӧлыс нора
Сьылӧ: зёль-зёль-зёль.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator didn't fight or work for Soviet Union victory during the Great Patriotic War — so the 70-year protection term is applied;
- and the creator died before January 1, 1954 (more than 70 years ago), and has been not posthumously rehabilitated since that date;
- and this work was first published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 97 years or less since publication (if applicable).
Public domainPublic domainfalsefalse