Туан йӹлмӹ (Канюшков Аркадий Максимович)

Канюшков Аркадий Максимович

ТУАН ЙӹЛМӹ

Пиш нӹжгӓтӓ вады тырын -
ӓшӹндӓрeм кӹзӹтӓт -
ӓвӓм мырeн рӹпшӹм мырым:
"Изи эргeм пӓпӓлтӓ..."

Пӹтӓриш шамакeм "ӓвӓм"
Марла шачын тӹнӓмок.
Вара шукы шамак тӓвeн
Цӹзӹм шыпшмы годымок.

Вуйыштeмжӹ мам шанeнӓм,
Миэн марла вӹдӹлӓлт.
Тишeц яжо, машанeнӓм,
Укe вeсӹ ик йӹлмӓт.

Марла попeн шаным тӓнгeм,
Вуйта шӹрeн миэн ӱм.
Пиш йӹвӹжӓн, ласкон шӓнгӹн,
Виш лимeшкӹ нӹжгӓ шӱм.

Марла лыдын, марла попeн,
Тымeнь шонам рушлажат.
Шӹрeнок пырeнӹт токeм
Пушкин, Гоголь, молыжат.

Йӹмeн вацмыкы окопыш,
Рушвлӓ сага кимӓштӓт,
Кым и лошты марла попаш
Мондыдeлам изишӓт.

Фронт гӹц толмык, туан йӹлмeм
Нӹжгӓн шактeн утлаок.
Халык шаям колышт тӹлнeн,
Шӱмeм кырмeн тӹдӹн док.

Марла попeн, марла сирeн,
ӹлeн шонам шонгeммeш.
Вӹдваж ганьы соты ирeм
Кодаш шанeм курымeш.

Марын эдeм, ит шeклӓнӹ
Марла попаш нигыштат.
Тeк йӹлмӹнӓ ак тӹплӓнӹ
Солаштат дӓ халаштат!

Яжон пӓлeт гӹнь кок йӹлмӹм,
Лиӓт кок пай ышанрак.
Туан йӹлмeт ылeш сӹлнӹ -
Тӹшлӹ вeлe шукырак!

1989