Туан йӹлмӹ

From Wikisource
Jump to navigation Jump to search

Савельева Евгения Константиновна

ТУАН ЙӸЛМӸ

Мӹнь туан йӹлмем яратем,
ылеш мӹлӓнем шӧртньӹ гӹц шергӹ,
кечӹ гӹц соты.
Тӹдӹ соок нӓнгеӓ анзыкы,
тӹдӹ гӹц пачеш ак ли кодаш.
Тау, эксӹкӹм сӹнгӓш палшышы,
тау, мӹньӹм соок перегӹшӹ.
Тӹнь сагаэт куштылгы шўлӓш,
вуйта ире кырык вӹлнӹш вӓрӹштӹ.
Лӹпӹлӓ мадат пеледӹшвлӓ лошты,
шамакетӹм веле соок колыштына.
Туан, сек шергӹ ӓвӓмӹн тянгыра юкшы,
ивлӓ эртӓт, соок ылат шўмӹштӹ.
Кошкат ӓнгӹрвлӓ, тӹлӓтшӹ йўшӓшлык вӹдлӓ
пурым кандаш пуйырен.
Седӹндон ядам: перегӓл ӹшкӹметӹм,
тӹнь гӹцет пасна ямам
тӹрдӹмӹ кымдемӹштӹ.
Ит талашы пыраш шӹгерӹшкӹ.
Анжал тӹгӹрӹш: ӓнгӹр ганьы
соок пӹсӹ, косир тӹнь ылат.
Тӹньжӹ ямат – мӓжӓт ямына,
кодат сагана – мӓжӓт кодына.
Корнына иктӹ, иктӹ корнына,
ӹшкетем ам ыл – тӹнь ылат йӓнгӹштем.