Тӧдьы юсьёс тыэд вылтӥ
Чебер кошко уяса.
Удмурт ужъёс каллен ке но,
Азьлань мыно чиляса.
Вылын лобась дуннеослэн
Адӟымтэзы чик ӧвӧл.
Асьме удмурт ужасьёслэн
Тэк улонзы чик ӧвӧл.
Сяськаосыд тӧлӟыло ке,
Емышъёсыд пӧрмыло.
Ужасьёсмы туж тыршо ке,
Котьмар ӟечсы вӧлмыло.
Со ӟечъёсын, дэлетъёсын
Котькин, котьмар воштӥське.
Каньыл улон луонъёсын
Шумпотыса ушъяське.
Сӥзьыл асьме егитъёс
Тырос тырмо вузъёсы,
Гуртэ кылем пиналъёс
Ветло асьме школъёсы.
Бусыосын герыосыд
Тракторъёсын воштӥсько.
Азе ошем кудыосыд
Машиналы берытско.
Купырмыса бырем куанер
Пиньтэм сюрло шумпотэ:
Сое воштэ «аран» шуон
Юэз тӧлӥсь машина.
Бакча тырос пушнеред но
Каллен, каллен бырылэ.
Со интые вож-вож будӥсь
Емышъёсыд пӧрмылэ.
Корка пушкын аръян шуккем
Бультыръямъёс чалмыло,
Со интые сепаратор
Ӵашетэмъёс вӧлмыло.
Киысь кие тэтчась кусо
Бурдтэк лобан малпаське.
Быдэсак ик котькин, котьмар
Выль улонэн ушъяське.