Трактористлӧн сьыланкыв
Мун веськыда, уклада друг!
Мед ловъя моз му пластыс вӧрӧ,
Мед мусӧ шыльыдджыка гӧрӧ
Вит лемеха выль вайӧм плуг.
Кор петім — вӧлі асъя ру,
Сэк вӧлі шонді муртса петӧ.
Ме, трактор, нэмӧс ола тэкӧд,
Тэ менам ӧтка — вернӧй друг!
Кор тэнсьыд жургӧм ме ог кыв,
Сэк меным долыда оз овсьы.
Сэк вӧлись сьӧлӧм менам ловзьӧ —
Кор кыла тэнсьыд мотор шы.
* * *
Мун веськыда, уклада друг!
Мед ловъя моз му пластыс вӧрӧ,
Мед мусӧ шыльыдджыка гӧрӧ
Вит лемеха выль вайӧм плуг.
Зэра ар бӧрын воас тӧв,
Сэк бара, майбыр, уджыс воссьӧ!
Кулаккӧд водзӧ нуам косьсӧ.
Тӧд: доддьӧ сӧмын керъяс сӧвт.
«Кӧть ӧшӧд — нормаӧй оз тыр,
Ог вермы сёысь вӧчны вылӧ», —
Кулак да сыкӧд нювсьысь сьылӧ.
Ми тэкӧд, трактор, тайӧс кылам
Да сетам плешкас налы пыр.
* * *
Мун веськыда, уклада друг!
Мед ловъя моз му пластыс вӧрӧ,
Мед мусӧ шыльыдджыка гӧрӧ
Вит лемеха выль вайӧм плуг.
Кулаклы киысь руль ог сет,
Кулаклы торкны план ог сетӧ!
Ми тӧвнас, трактор, кыскам тэкӧд
Зэв уна-уна кубометр!
Тэ вӧчан, трактор, гырысь удж.
Став омӧль-важсӧ йӧткан бокӧ
И сідз жӧ водзӧ пондам! Ноко!
Мед важсьыс оз коль ӧти вуж.
* * *
Мун веськыда, уклада друг!
Мед ловъя моз му пластыс вӧрӧ,
Мед мусӧ шыльыдджыка гӧрӧ
Вит лемеха выль вайӧм плуг.
Кор воас тулыс — ловзьӧ му.
Быд кӧдза турун муысь петӧ.
А миян ковмас, трактор, тэкӧд.
Колхозын кокньӧдыштны удж.
Ми уджсӧ вӧчам, сӧмын вай!
Ми гӧрам, пинёвтам и кӧдзам!
Ми няньсӧ вундам, вартам, тэчам!
Ме тӧда, трактор, — тэ он сдайт!
* * *
Мун веськыда, уклада друг!
Мед мусӧ шыльыдджыка гӧрӧ
Вит лемеха выль вайӧм плуг!
Мед ловъя моз му пластыс вӧрӧ!
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator fought or worked for Soviet Union victory during the Great Patriotic War — so the 74-year protection term is applied;
- and the creator died before January 1, 1950 (more than 74 years ago), and has been not posthumously rehabilitated since that date;
- and this work was first published before January 1, 1950 (more than 74 years ago).
The author died in 1942, so this work is also in the public domain in other countries and areas where the copyright term is the author's life plus 81 years or less (if applicable), or the copyright term is 93 years or less since publication (if applicable).
Public domainPublic domainfalsefalse