Трактористка
Вольсасьӧ му кузя
Тракторлӧн лолалӧм,
Зарниӧн дзирдалӧ лун...
Мыйла мем лолавсьӧ
Татшӧм долыда?..
Мыйла ме водзӧ ог мун?
Сулала му вылын,
Синъясӧс тувъялі..,
Тракторлысь мойдӧм ог кыв.
Том трактористкалань матыстчи...
Юалі: «Кысь тэнӧ аддзывлі, ныв?»
Бергӧдчис...
Юр пытшкын мӧвпъясӧй гыасьӧ...
Лэбзьыштіс вӧтын моз кад:
— Эн висьтась, том нылӧй!
Тӧдмала, шыася!
Водзӧ мун, му пластсӧ гарт!
Серӧктіс...
Чорыда руль дінӧ кутчысис...
Юрсисӧ пыркнитіс тӧв.
Му пластӧс бергӧдіг
Мӧдӧдчис му кузя
Гор шыа кӧрт кока вӧв.
Аръявыв — гӧлӧсъяс
Ловзисны яг шӧрын;
Серӧктіс пила да чер.
Паськыда визувтіс
Тракторлӧн тарӧдчӧм,
Ю дорӧ гольӧдӧ кер.
Барактыр йӧз.
Ставныс кӧмнысӧ пӧрччӧны,
Ӧдзӧсті ыпъялӧ ру.
Ывлаын том йӧзлӧн
Сорсьӧны гӧлӧсъяс:
— Вештыштӧ додьястӧ-ӧ!
— Тпру!..
Рыт.
Оз нин грымакыв пожӧма вӧрыс,
Асылӧдз ланьтӧма яг.
Пырӧны, петӧны...
Лэдзӧны вӧвъясӧс.
Шызьӧма, юргӧ барак.
Ужнайтны!..
Пуксисны гӧгӧрыс тырӧныс.
Чӧскыда руалӧ шыд.
Недыр мысьт гажаа
Упнитіс сынӧдыс —
Сьылӧмӧн гажмӧма рыт.
Гӧрд пельӧс
Пелькӧдӧм...
Пызантыр газетъяс;
Югыда ломалӧ би,
Стен шӧрын пукалӧ —
Неуна чатӧртчис...
«Правдаӧс» лыддьӧ Ильич.
Кодсюрӧ кывзӧ газетъясысь
Выльторсӧ...
Гораа лыддьысьӧ зон.
Кодсюрӧ —
Шашкиӧн колльӧдӧ кузь рытсӧ.
Некодӧс оз на босьт он.
Бараксянь — кылыштӧ:
Гудӧкӧн ворсӧны.
Ворсӧдчис том йӧзлӧн вир.
Параӧн-параӧн
Ӧти мӧд бӧрсяньныс
Йӧктӧны том йӧз кадриль.
Сы бӧрын во...
Дзонь во кольӧма сайын.
Дзонь во эз ланьтлы збой яг.
Бара на тӧв шӧрын сыланьӧ кайи,
Аддзи и тӧдса барак.
Ягын
Бригада.
Кӧкъямысӧн,
Том йӧз,
Сы пытшкын томиник ныв.
Морт вылӧ
Вӧчӧны уна кубометрӧн,
Олӧмӧ пӧртӧны кыв.
Рытсёрӧдз упъяліс,
Пожӧма пуясыс
Усясны лым вылӧ — бус!
...Паськӧмсӧ волясны...
...Увъяссӧ сувъясны —
Нюжмовтчас мича да кузь.
Гӧрд пельӧс...
Тӧдчымӧн гӧгӧрыс вежсьӧма;
Шойччӧмыс, лыддьысьӧм — дась.
Гижӧда гӧрд пӧвйӧн
Кузь стеныс эжсьӧма,
Сэні — геройлӧн нимпас.
Медводзас гижӧма
Гӧрд мича шыпасӧн
Тӧдсалӧн...
Нывкалӧн ним!
Ӧні со му шӧрын —
Том трактористкалӧн —
Морӧсас югъялӧ «КИМ».
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator fought or worked for Soviet Union victory during the Great Patriotic War — so the 74-year protection term is applied;
- and the creator died before January 1, 1950 (more than 74 years ago), and has been not posthumously rehabilitated since that date;
- and this work was first published before January 1, 1950 (more than 74 years ago).
The author died in 1942, so this work is also in the public domain in other countries and areas where the copyright term is the author's life plus 81 years or less (if applicable), or the copyright term is 91 years or less since publication (if applicable).
Public domainPublic domainfalsefalse