Тесэ ды тосо (2013)/8
| ←Сисемеце сёрмась | Тесэ ды тосо (2013) by , edited by Ломшина Л. А. Кавксоце сёрмась |
Вейксэце сёрмась→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 44—46 |
[44]
| * * * |
| Кавксоце сёрмась |
Ожосо пургсезь Эрицянь Масторов, Учаень Валдайнень
Шумбрат-парт теть, Валдай валдынем!
Сюконян сёрмат кис. Ловныя колмоксть. Нурькинель. А стака истямонть ланга нилецедеяк ютамс. Нувсемат... Кодат нувсемат! Сыть превезэнь ледстнематне ды вельмевтьсызь эрямосон весемеде покш ильведьксэм — тейтерьксчинь ёмавтомам. Мезекс, чаула пря, ёвтнинь теде тонеть! Аволь эряво. Мекс аволь эряво? Монтеменьгак содылить. Каня Цянтаронь Вечкай эзь пачтя?
Ловныя, та-кода понгсь икелень, ташто сёрмат, кучокшнык 1999-це иень якшамковонь 2-це чистэ. Эйсэнзэ ёвтневи велев сакшномадот, килангсо майсевемадот. Ловнынь вана ней эйстэдест, ды вельмесь мештесэнь лембе ёжине: килангонь стакачитнень пачк — якшамо вагононь тамбурсо, колоньгемень вайгельпеть шлёбор-шлёбор рудазов кива ялго — ютакшныть монь кис, монень самсто. Кодамо тейтерень, авань, кодамокс сестэ уш ульнинь, седей а кирвази, зярдо вечкицязо анок кисэнзэ весемес — каявомс толс, чадыведьс, отьмас...
[45] Содат мезе, Валдай, иля пеняця лангозон, сёрмадомань ёрокчи Пазось тень эзь максо. Мезде сёрмадомс — а содан. Седеяк — тесэ, Тоначисэ. Тень кувалт тон колат. Шнатан. Мель путт, сёрмадт, сюконян, монь кисэяк. Содан: тонь валот — а сюват, эйсэст мельть, арсемат, кеняркст эли ризнэвтиця, нусманя ёжот. Ёвтнемат ловновить мелень витезь.
Прям мекс-бути марян беряньстэ, куш тесэ минь сэредемат, пштикст-чулксетемат а содатано. Рунгонь ормат арасть. Косто сыненст улемс, бути минек а прят, а серькат, бути арась сонсь рунгось? Ёвтнинь уш теде. Сень кис оймеёжотне Модалангонь коряс седе марицят ды сорныцят. Содак: эрьвась тесэ мари ансяк эсь ёжонзо. Пиштевти-арась шабразо, кияк а соды. Кежиявтнек, кецнек, кавтолдт, янксек, цильнек, сюмордт... Неть эрьва кодамо тюсонь ёжотнеде соды эрьва оймесь ансяк сонсь.
Саты теде. Калякавинь, маряви. Вере эрямсто меревлинь: «Саты, келем кортамодонть човалгадсь!».
Содат мезе, Валдай, сёрмадт аволь ансяк эседенек. Иля стувтне Чипаень ало эрямонь лия кулятнедеяк: виртнеде-паксятнеде, лугатнеде, вейсхозонь мелявкстнэде, койтнеде... Каня весе лововить?
Саты, уш омбоцеде мерян.
Молян чиреман, тынк кортавксонк коряс, аламос. Оймсян. Ёжом мекс-бути каладсь. Телькеминь. Паряк, а паро валсо лемем кундсить?
Вай, тунь стувтокшныя! Пачтяк, энялдан, мезе маряви велесэнть Паксютонь Марюшто. Черензэ нейгак истят раужот? Сельмечирькензэ? Сынь, кемеви, раужот, кодат ульнесть, прязо вана, маряви, умок-умок копачавсь ловсо. Ашаензэ марто эри? Ма-а-азыель цёрась... Эйкакшост ламо? Таркава-эземга аравтневсть? Куват?
Ледстнеме а карман, содат, Марюш ульнесь тень весемеде малавикс ялгакс. Мон сондензэ мезеяк эзинь сёпо. Текеньсэ пандсь сонгак. Вейсэ якинек аштемкужос, вейсэ морсинек-киштнинек, вейсэ якинек важодеме. Ашай — сэрей, одёр цёра... Эзик стувто? Пансесь сон Марюш мельга, [46] тон, Валдай, — монь. Леди мелезэть се иесь, мизолксось калавтсынзе турват. Сырнень шка! Минь вейкенек-вейкенек, мезде уш ёвтнинь, муинек сеске. Секскак тонь пансеманть ансяк лемезэ пансема. Пароль, дугай, теде башка, сёрмадовлитькак аштемкужосо морсезь мородонок. Кодатольть? Мельсэть? Эрзянь ульнесть?
Мелень ванозь, певтеме вечкицят Вияна.
Тоначи.
Поладкс: мекс валгак эзить тешкста энялдомам каршо, конань ёвтакшныя васенце сёрмасон? Эзить пачколе ламаренек содавтомо? Понгат Орданьбуев, ютак Пичепев, содавтык.
Сюконян теть чачома чизэнь алтазь паро арсемат кис. Кундсик лемем. Кецневтимик. А стяко цивтёрдсть, теке сеересть тень, тердсть эйсэнь менельсэнек сяткинетне. Сюк-сюк, Валдай!